Christus-Kark (Warstood)

De Christus-Kark is de Kark von dat evangeelsch-luthersche Kaspel Warstood (Karkenkreis Hadeln). Ehren Naam hett se von Jesus Christus. To de Gemeen höört üm un bi 3.800 Lüüd to.

De Kark liggt in Warstood an de Straat Karkplatz nich wied von de Bundsstraat 73 un dicht bi’n Kriedsee.

Historie

Warstood hett von öllers to dat Kaspel von de Bartelmees-Kark in Loomst tohöört. De Weg dor hen weer acht Kilometer wied. Dorüm hebbt de Warstoders an’n 4. April 1780 en Anfraag an dat Konsistorium in Stood stellt, dat se nich mehr to Loomst tohöörn wullen. Dat is aver aflehnt worrn.

De Christus-Kark is denn von September 1897 af an ünner Architekt Eduard Wendebourg boot un an’n 5. Dezember 1898 inwieht worrn. To de Tied weren de Öörd ümto düchtig wussen, nadem de Hemmoor Zement AG en Barg Arbeiders antagen harr. En egen Karkengemeen, de unafhängig von Loomst weer, is dat denn 1903 worrn.

De Kark is ut rode Zementsteen ut dat Hemmoorer Zementwark boot in’n Stil von de Neegotik.

Örgel

De Örgel is 1898 von de Firma Furtwängler & Hammer boot worrn. Se hett twee Manuals, een Pedal un 18 Registers.

1985 hett de Firma Schmidt un Mappes de Örgel restaureert.

Pastoorn

1897–1908: Karl Thielbörger
1908–1914: Nebel
1914–1921: Wilhelm Wendebourg
1921–1929: Hermann Ubbelohde
1980–September 2014: Uwe Erdmann
Oktober 2015–2019: Martina Wüstefeld

~1998: Johannes Neukirch
2014–2019: Manfred Lea
1987–2018: Heike Mangels

Kaspel

To dat Kaspel Warstood höört de Öörd Warstood, Westersood, Hemmoor, Hemm un Brökelbeek to.

De Naverkaspels sünd Öberndörp in’n Noorden, Oosten in’n Noordoosten, Basbeek in’n Süüdoosten, Loomst in’n Süüdwesten un Kumbarg in’n Noordwesten.

Literatur

100 Jahre Kirche Warstade. 1998

Weblenken

Christus-Kark. Mehr Biller, Videos oder Audiodateien to’t Thema gifft dat bi Wikimedia Commons.

Websteed von de Karkengemeen (hoochdüütsch)

Koordinaten:53° 42′ N, 9° 8′ O