Crossover (engelsch: Översnieden, Krüzen) bedüüt in de Musik, dat en Leed, dat to en sünner’t Musikgenre toordent is, in tomindest twee na Musikgenres scheedte Hitparaden platzeert is. De Begreep is in de 1940er Johren prägt worrn, as dat noch begäng weer, Hitparaden na de enkelten Musikstilrichten to splitten. De Bedüden hett sik later ’n beten änndert, as Fusionen twüschen Rock un annere Stilrichten tostannen kamen sünd un man nich mehr recht wüss, wo de Leder nu torekent warrn müssen.

Ünnerscheedliche Bedüden ännern

Bi den Begreep warrt twüschen mehrere Orden vun Bedüden ünnerscheedt:

  • Dat Versmölten vun verscheden Genres vun de Rock- un Popmusik, wat sünners Alternative Rock un verschedene Orden ut dat Rebeet Dance Music, Electronica as Funk oder Hip-Hop ümfaat. Dat Ingrenzen is faken teemlich swoor bi de velen Stilrichten. In de Twüschentiet warrt de Begreep Nu Metal bruukt för de Kombinatschoon vun harde Gitarr-Kläng mit Rap-Inlagen, liekers dat dat nich faken op den fröheren Vörlöper vun dissen Stil todrapen deit.
  • Dat Verknütten vun düchtig ünnerscheedliche Musikkategorien as to’n Bispeel Klassische Musik mit Rockmusik.
  • Spood vun en Musiker in en Stilrebeet, in dat he normalerwies nich arbeiden deit oder över sien egentliche Teelgrupp rut.
  • Dat Mischen vun Jazz un Rock in de 1970er Johren, wat ünner de Beteken Fusion oder Jazzrock bekannt worrn is.

Enwickeln ännern

Oorsprung ännern

De Historie vun’n Crossover geiht los mit dat düütliche Afgrenzen vun de ünnerscheedlichen Musikrichten in de USA, vör allem mit dat Isoleeren vun en anfangs eenheitliche Hitparade in swarte Rhythm and Blues-, witte Country & Western- un Pop-Charts in dat Johr 1942 dör dat Billboard-Magazin. De enkelten Genres sünd ok toeerst in jemehr tohören Charts bleven. Blangen disse technische Splitten geev dat aver ok en bi de Köpers, vun wegen dat de witten Köpers lever „witte“ Country- un Popmusik köpen aver ok in’t Radio hören deen. Disse Opsplitten is mit de Tiet jümmer starker överwunnen worrn. Platten vun de Mills Brothers, Ink Spots oder Louis Jordan, de an sik för den „swarten“ Konsum dacht weern, sünd mehr un mehr ok vun Witte höört un köfft worrn.[1]. Dormit sünd se faktisch al Crossover-Interpreten worrn. Dat wies sik 1943 denn ok in de Hitparade, as de Mills Brothers mit dat beropen Paper Doll ok in de Pop-Charts intogen is. Louis Jordan folg in’n Januar 1944 mit den Ratio Blues. Disse mehr technischen Crossovers weern noch dordör kenntekent, dat se in jemehr „Stammhitparade“, also in de Rhythm & Blues-Charts, beter platzeert weern as in de Pop-Charts.[2]

Disse Richt in denn vun Pat Boone un annere utnütt worrn, as se „swarte“ Originalfaten covert hebbt un so för de Pop-Charts togänglich maakt hebbt. So hett Pat Boone in’n Juli 1955 dat Leed Ain’t That A Shame vun Fats Domino nee opnahmen, dat in de Pop-Charts bit op’n eersten Platz kamen is. Dat Original vun Domino is in’n sülven Maand blolts bit op Platz 10 kamen. In de Tiet dorna hebbt jümmer mehr witte Singers op „swarte“ Orignalmusik torüchgrepen, bit Elvis Presley mit Hound Dog in’n August 1956 mit mehr as 3 Millionen verkööfte Platten den kommerziellen Hööchpunkt vun’n Crossover instellt hett. Dat Original vun Big Mama Thornton harr blots in de R&B-Charts Spood. Dat Crossover hett dormit en nee Utmaat annahmen: Dat weern nu nich mehr de Original-Interpreten, de in annere Hitparaden Spood harrn, man de Cover-Versionen. In de folgen Tiet hett disse Entwickeln so dull tonahmen, dat Billboard twüschen 1963 un 1965 gor keen R&B-Charts mehr publizeert hett, vun wegen dat de Tall vun’t Crossover so dull tonahmen hett, dat de Charts vun’n Pop und vun’t R&B vun Inholt her meist gliek weern.[3]

In de 1980er Johren geev dat denn en wietere Entwickeln hen to’t Versmölten vun verscheden Stilrichten. In de nordamerikaanschen Szeen vun’n Hardcore-Punk weer man op de Söök na ne’e Utdrucksformen. Dör dat nege Verwandschop weern faken Metal- un Hardrock-Elementen insett. Man vun’t Prinzip her weer dat begrenzte Punk-Schema gegenöver meist all Rebeden vun de populären Musik apen maakt, un weer denn lange Tiet gliekbedüden mit künstlerische Freeheit.

Musikaalsche Vörlöpers vun disse ne’e Utrichten weern Musikgruppen, de blots swoor intoorden un in Schuuven as Post Punk oder New Wave rintsteken weern. Later weer mehr un mehr ok mit Stilrichten as Country, Jazz oder Funk experimenteert, wobi de grundsätzliche Energie vun’n Punk ut de 1970er Johren bibehollen weern. Vörher harr man noch meent, dat disse Stilen nich dorto passen deen. Op disse Wies is en brede Bewegen vun toeerst subkulturell utrichte Rockmusik tostannen kamen, de sik vun’n oorsprünglichen Punk jümmer wieter weg bewegen de.

Eenige Gruppen as Minutemen, de Bad Brains oder Public Image Ltd., de Funk-, Reggea- oder Jazz-Elementen verarbeiten deen, sünd vun konservative Punks ut de eersten Generatschonen düütlich aflehnt worrn. Ok üm Oppositschoon to maken gegen disse Oort vun Dogmatismus hebbt progressivere Hardcore-Musiker Mitt vun de 1908er Johren af ok na buten hen versöcht, sik vun’n traditschonellen Punk aftosetten. Se bruken mit Afsicht „Koods“ vun de ünner Punk slecht ansehn Hippie-Generatschoon, hebbt sik de Hoor lang wassen laten un Jeans un Flanelhemmen dragen. In de fröhen 1990er Johren is disse Oort sik antotehn dör den groten Spood vun Grunge-Musikgruppen bannig populär worrn.

Anfang un Blööt ännern

Dat ne’e Sülvstbewusstwesen is Anfang vun de 1990er Johren op en breet Publikum drapen. Tosamen mit den so nöömten Grunge is en ne’e Szeen entstahn, de sik vun’n Punk afsetten de. De „Hardcore-Funk-Crossover“ nimmt dor binnen en Sünnerstellung in, de ok in de Metal-Szeen veel Anhangers tell un dor to’n Anfang „Funk Metal“ nöömt worrn is.

Al Mitt vun de 1980er Johren geev dat en Reeg vun Musikgruppen as Living Colour oder de Beastie Boys. Acht hett jemehr Arbeit aver eerst so richtig funnen, as dat mit den groten kommerziellen Spood vun Faith No More un de Red Hot Chili Peppers los güng. In den Tosamenhang keem denn ok ut annere Richten groot Intresse op. De as „New School“ betekente tweete Generatschoon vun’n Hip-Hop arbeit t. B. geern mit Hardrock-Beats. Run DMC harr al 1985 en Hit mit Walk This Way, en Klassiker vun Aerosmith. Söss Johren later hebbt Public Enemy en Tournee mit de Metal-Band Anthrax maakt, de vörher al Rap-Inlagen in jemehr Musik inbröcht hebbt. Tosamen hebbt se de Single Bring Tha Noize rutbröcht.

Dat Phänomen is denn bald ok vun de kommerziellen Musikindustrie opnahmen worrn. En Bispeel is de Soundtrack to den Film Judgment Night, den Hip-Hop-Muskanten tosamen mit Metal- un Alternative-Rockgruppen inspeelt hebbt. Se Spood vun dat Album weer veel grötter as de Resonanz vun den egentlichen Film.

De Beteken „Crossover“ hett sik vör den Achtergrund vun en tweete Phaas vun Crossover-Gruppen fastsett, de vun’t Massenpublikum al nich mehr mit Hardcore in Verbinnen bröcht weern. Disse Oort vun Crossover weer twüschen 1994 un 1998 de bestimmen Trend in de Alternative- un Metal-Szeen. Gruppen as Rage Against The Machine, Body Count oder Dog Eat Dog hebbt bannig veel Alben verköfft. As sik de Begreep „Crossover“ goot as Kennteken vun disse Gruppen egen dee, hett he sik in’n düütschen Spraakruum för den Stil vun disse Gruppen dörsett. Dorher kummt dat ok, dat vundaag faken verkehrt annahmen warrt, dat Crossover mit en Oort vun „Rap-Metal“ gliektosetten weer. Man, dat is blots de noordamerikaansche Crossover-Richt vun’n Hardcore, de kommerziell den gröttsten Spood harr. Na un na hett dit Phänomen de ne’en Beteken Nu Metal kregen, ünner de disse Musikricht siet de laten 1990er Johren mit Gruppen as Limp Bizkit oder Linkin Park wedder starker acht worrn is, wat bit vundaag anhollt.

De Begreep Crossover warrt to’n Deel veel wieter faat. Opletzt gifft dat glieke Phänomenen as t. B. Ska-Punk oder Industrial Metal un Industrial Rock, de ok de Grundlaag vun’t Krüzen vun ünnerscheedliche Stilrichten ut Pop- un Rockmusik to finnen is. Aver ok musikaalsche Versmölten, de över disse Definitschoon rut gaht, warrt as Crossover betekent, vun wegen dat dat de Naam is, de an’n besten dorför passt. Sünners Gruppen as Oomph!, Die Krupps, Cubanate oder Think About Mutation mischt vele elektroonsche Speelorden mit Rock un Metal un weern vun dorher blots swoor inorden.

In Düütschland weern de Freaky Fukin Weirdoz de eersten, de as Crossovergrupp betekent weer. Gruppen as Such A Surge, H-Blockx un Thumb harrn kort dorna ok kommerziellen Spood. Crossovergruppen geev dat ok in annere europääsche Länner. Dorto tellt t. B. Urban Dance Squad ut de Nedderlannen, F.F.F. ut Frankriek, Senser ut Grootbritannien oder Clawfinger ut Sweden.

Vundaag gifft dat blots noch wenige Gruppen, de nipp un nau to’n Crossover torekent warrt. Dat liggt to’n Deel doran, dat Crossover nie en sünnere Stilricht betekent hett, man jümmer dat Vermischen vun verschedene Richten meent hett. To’n annern is dat vundaag mehr oder minner sülvstverständlich, dat sik Gruppen vun verschedene musikaalsche Richten inspireren laat. Blots noch wenige Stilrichten as to’n Bispeel bi’n True Metal warrt dat Övernehmen vun Elementen ut annere Richten aflehnt.

Borns ännern

  1. Arthur Shaw, "Dictionary of American Pop", New York 1982, S. 99 f.
  2. Arthur Shaw, "Dictionary of American Pop", a.a.O. S. 100
  3. Arthur Shaw, "Dictionary of American Pop", a.a.O. S. 101

Kiek ok ännern