Diederich Basilius von Stade
Diederich Basilius von Stade (* 13. Oktober 1705 in Stood; † 3. September 1783 ok dor) weer en düütschen Jurist.
Von Stade is 1705 as Söhn von Margarethe Elisabeth, borene von Borstel (29. September 1675–1712), un den Beamten Dieterich von Stade (8. Februar 1674–30. Oktober 1725) in Stood boren.[1] Bet 1712 hett he in Stood Ünnerricht bi Huuslehrers kregen.[1] Sien Vader weer Regerungsraad in Stood un is 1712 na Bremen flücht, as de Dänen Stood innahmen hebbt.[1] In Bremen hett he bet 1715 ok noch Huusünnerricht kregen un is denn bet 1717 dor op de öffentliche School gahn.[1] In’n Oktober 1717 is sien Vader as Komitialgesandten an’n Rieksdag in Regensburg schickt worrn un von Stade hett dor bet 1725 wedder Huusünnerricht kregen.[1] Von 1725 bet 1728 hett he an de Universität Halle Juristeree studeert.[1] Na dat Studium is he in’n kurhannöverschen Justizdeenst gahn un is Auditer bi de Justizkanzlie Celle worrn.[1] Von 1730 bet 1733 weer he tosätzlich Assesser bi dat Hoffgericht Celle.[1] He is 1733 Hoffraad worrn un an’n 31. März 1736 Oberappellatschoonsraad bi dat Oberappellatschoonsgericht Celle.[1] Dat weer he bet 1751, as Johann Friederich von Borries doodbleven is.[1] An’n 8. Juli 1751 is von Stade as Borries sien Nafolger Direkter von de Justizkanzlie Stood un dat Hoffgericht Stood worrn.[1] Ok dat Amt as Direkter von dat Kunsistorjen weer dor mit verbunnen. Dat Direkteramt hett he bet to sien Dood 1783 behollen.[1]
Von Stade hett an’n 13. Oktober 1734 Sara Hedewig Sophie von Borries (23. März 1714–1751; Dochter von Johann Friederich von Borries) freet.[2] De beiden harrn söven Döchter, von de aver blots veer groot worrn sünd.
Footnoten
ännern- ↑ a b c d e f g h i j k l Johann Hinrich Pratje: Vermischte historische Sammlungen. Verlag des Vaterländischen Vereins, 1844, Band 2, Sied 470
- ↑ Johann Hinrich Pratje: Vermischte historische Sammlungen. Verlag des Vaterländischen Vereins, 1844, Band 2, Sied 213