Eduard Christian von Lütcken

Eduard Christian von Lütcken (* 2. Dezember 1800 in Jörk; † 25. April 1865 in Ossenbrügge) weer en hannöverschen Politiker un von November 1853 bet Juli 1855 Ministerpräsident, Huus-, Finanz- un Hannelsminister.

Eduard Christian von Lütcken is 1800 as Söhn von Margarete Dorothea Amalia, borene von der Decken (9. April 1773-1. Februar 1848), un den Verwaltungsbeamten Claus Heinrich von Lütcken (18. Mai 1765-22. September 1819) in Jörk boren. He hett Juristeree an de Universität Göttingen studeert. Von Lütcken weer dor Liddmaat von dat Corps Bremensia Göttingen.[1] Na sien Studium is he 1822 Auditer bi dat Amt Oosterholt worrn, 1824 Hoffgerichtsassesser bi dat Hoffgericht Stood, 1826 Interimsadministrater un Amtsassesser bi dat Grevengericht Oolland un 1834 Greev von dat Grevengericht. He is 1838 Kabinettsraad in dat Kabinettsministerium worrn un 1842 Gehemen Kabinettsraad. De breemsche Ridderschop hett em in de eerste Kamer entsandt. Dor weer he bet 1840 Generalsyndikus. Von 1839 bet 1848 weer he außerordentlich Liddmaat von’n Hannöverschen Staatsraad, denn 1849 bet 1855 Liddmaat von’n Staatsraad un 1856 bet 1864 wedder auerordentlich Liddmaat von’n Staatsraad. In de Tied von 1853 bet 1855 weer he Präsident von’n Staatsraad. Von 1842 bet 1845 weer he Landdrost in Horborg un gliektiedig Amtmann von dat Amt Horborg un von 1845 bet 1853 Landdrost von de Landdrostie Ossenbrüge. In’n November 1853, nadem dat mit de Verfatensrevision in Hannover nich klappt hett, is dat Ministerium Schele trüggtreden un dat hett Neewahlen för de Twete Kamer geven. Bismarck harr hööpt, dat Georg Heinrich Bacmeister mit dat Billen von en neet Kabinett beopdragt warrt. Aver dor is nix von worrn, von wegen dat de hannöversche Ridderschop mit Bacmeister nich verhanneln wull. De Ridderschop hett denn von Lütcken as ehren Kannedaten vörslahn. Mit von Lütcken wull de Ridderschop dat henkriegen, dat de Verfaten in ehr Gestalt vör 1848 dör Hülp von’n Bund wedder herstellt warrt. 1855 hett Georg V. de liberale Verfaten wedder ophoven un von Lütcken hett sien Amt afgeven. Von 1856 bet 1865 weer he denn wedder Landdrost von de Landdrostie Ossenbrügge.

Von Lütcken hett an’n 16. April 1850 Charlotte von Gülich (6. April 1814-28. Mai 1874) freet. De beiden hebbt den Söhn Eduard (21. Dezember 1851-10. November 1926) hatt.

Footnoten ännern

  1. Kösener Corpslisten 1910, 63, 127