Elm (Landkreis Cuxhoben)

Wapen/Flagg	Koort
Basisdaten
Bundsland: Neddersassen Landkreis: Cuxhoben Gemeen: Geestland
Inwahners:
Postleettall:	27624
Vörwahl:	04704
Geograafsche Laag:	53° 35′ N, 8° 45′ O

Elm (hoochdüütsch Elmlohe) is en Dörp in de Gemeen Geestland in’n Landkreis Cuxhoben, Neddersassen. Dat höört to de Oortschop Elm binnen de Gemeen. Bi Elm höört ok de lüttje Oort Neemöhlen mit bi.

Luftbild von’n Elmer Brink 2012

Luftbild von Elm 2012 (Möhlenstraat, Kührster Straat)

Geografie

Elm liggt op de Geest. So bi dree Kilometer weg löppt in’n Süden de Stroom Geest langs. De Quabbenbeek flütt dör dat Dörp un denn na de Geest hen.

De Naveröörd sünd Drangst in’n Noorden, Beers un Alfst in’n Noordoosten, Kührst in’n Oosten, Oolluunbarg in’n Süüdoosten, Sellst in’n Süden, Marschkamp un Bramel in’n Süüdwesten, Laven in’n Westen un Wehden un Neemöhlen in’n Noordwesten.

Historie

Elm is to Anfang von dat 14. Johrhunnert von de Herren von Beers as Nedderungsborg an’n Quabbenbeek anleggt worrn. Op’n Fre’en Damm na de Borg hen hebbt se Handwarkers un Buurn ansiedelt. 1346 hebbt de Herren von Elm un de von de Lieth en Kark in Elm boon laten. De Kark weer na de Moder Gades nöömt. Dat Rebeed harr vörher to dat Kaspel Debst höört.

Vonwegen Ungehorsam gegen sien Lehnsherr is de Borg Elm ünner Cord von der Lieth 1485 von’n Bremer Raad belagert un toschannenricht worrn. De Familie von de Lieth is bet in dat 18. Johrhunnert Besitter von dat Good Elm bleven.

1962 hett de Bundswehr anfungen, bi Elm de Grundnetzschalt- und Vermittlungsstelle der Bundeswehr (GSVBw) 22 antoleggen. Disse Anlaag is 1996 stillleggt worrn. 2009 hett de Vereen Vorbei e.V. de anlaag övernahmen un dor en Museum inricht.

Elm is an’n 1. August 1968 mit Marschkamp to de ne’e Gemeen Elm tohoopleggt worrn. Von 1971 bet 1974 hett disse Gemeen to de ole Samtgemeen Beers höört. Mit de Gemeenreform in Neddersassen to’n 1. März 1974 is dat Deel von de ne’e, gröttere Samtgemeen Beers worrn. Gemeen un Samtgemeen sünd to’n 1. Januar 2015 oplööst worrn. Sietdem billt de fröhere Gemeen Elm en Oortschop mit egen Oortsraad un Oortsbörgermeester binnen de Gemeen Geestland.

Inwahnertall

Johr	Inwahners
1824-00-001824	47 Füürsteden
1848-00-001848	291 Lüüd, 52 Hüüs
1910-12-011. Dezember 1910	364
1925-00-001925	375
1933-00-001933	378
1939-00-001939	391

Religion

Elm is evangeelsch-luthersch präägt un billt mit de Leevfroon-Kark en egen Kaspel.

Wapen

Dat Wapen wiest op sülvern Grund dree gröne Iepernbläder.

De Iepernbläder staht för den Naam von’n Oort (Elmloh: Holt ut Iepernbööm).

Kultur

Verenen

Turnierplatz von’n Riedervereen

De Freewillige Füürwehr in Elm is 1899 grünnt worrn un de Schützenvereen Elm-Maschkamp 1902.

De Riedervereen Elm-Maschkamp is 1929 grünnt worrn. De Vereen veranstaltet ok de Elmer Riederdaag, en Turnier, dat ok över de Region rut bekannt is.

Weertschop un Infrastruktur

Ünnernehmens

De Volksbank Bremerhoben-Cuxland hett in Elm en Filiaal un ok de Raiffeisen Werser-Elv bedrifft in Elm en Standoort.

Verkehr

Elm liggt an de Kreisstraat 60, de in’n Noorden na Drangst an de Landsstraat 120 ran löppt un in’n Süüdwesten över Marschkamp un över de Geest röver na Bramel un Schippdörp. In’n Oosten geiht de K 62 na Kührst.

De nächste Opfohrt op en Autobahn is de Opfohrt 5 Debst op de Autobahn 27 (Afsnidd Cuxhoben–Bremerhoben), de so bi ölven Kilometer weg is.

De nächste Bahnhoff is de Hauptbahnhoff Bremerhoben an de Bahnlien Cuxhoben–Bremen, de so bi 15 Kilometer weg is.

Scholen

In Elm liggt een von de twee Standöörd von de Grundschool Drangst-Elm. De eerste un twete Klass sünd in Elm ünnerbröcht un de drüdde un veerde in Drangst. In Beers gifft datde Oberschool Beers un dat Neddersassische Internatsgymnasium Beers.

Literatur

• Chronik Elmlohe: Bilder eines Dorfes. Zeller Druck, Zeven 2008
• Elmlohe – ein Dorf im Wandel des Zeit 1308–2008. Elm 2008