Fachenfelln

Wapen/Flagg	Koort
Basisdaten
Bundsland: Neddersassen Landkreis: Horborg Gemeen: Stell
Inwahners:
Postleettall:	21435
Vörwahl:	04174
Geograafsche Laag:	53° 23′ N, 10° 4′ O

Fachenfelln (hoochdüütsch Fachenfelde) is en lütten Oort un ehmalig Eddelgood in de Gemeen Stell (Samtgemeen Elvmasch) in’n Landkreis Horborg, Neddersassen.

Geografie

Dör den Oort flütt de Kohlenbeek, de in’n Noordoosten in’n Ashuser Möhlenbeek münnt. Na Süden to doot dat Naturschuulrebeed Stemmbrook un dat Holt Baukweddel liggen.

De Naveröörd sünd Herrendiek in’n Noorden, Achterdiek in’n Noordoosten, Stell un Büllhorn in’n Süüdoosten, Holtörp in’n Süden, Ohlendörp, Host un Maschen-Heid in’n Süüdwesten un Maschen-Dörp un Hössen in’n Noordwesten.

Historie

Dat Good Fachenfelln hett von öllers de Familie Grote tohöört. As Georg Hinrich Gebhard Grote 1764 ahn Arven doodbleven is, is dat Good an de Familie von Jagow kamen.

As Thomas Günther von Jagow 1777 ok ahn Nakamen doodbleven is, hett sien Verwandten Georg Otto Friedrich von Jagow dat Good arvt. Georg Otto Friedrich is 1810 doodbleven un hett dat Good siene Dochter Charlotte Christiane Sophie von Jagow verarvt. Se weer verheiraadt mit Alexander Heinrich Hartwig von der Schulenburg.

1840 is dat Good an de königlich hannöversche Domänenkamer övergahn. In disse Tied weer dat Good verpacht an den Herrn de Dobbeler.

In de Tied üm de Johrhunnertwenn von dat 19. to dat 20. Johrhunnert weer Hugo Bernhard Sthamer Besitter von dat Good.

Goodsherrn

• –1567: Jacob Grote
• 1567–1572: Thomas Grote
• 1572–1616: Otto X. Grote
• 1616–1657: Thomas IV: Grote
• 1657–1716: Thomas VII. Grote
• 1716–1764: Georg Hinrich Gebhard Grote
• 1764–1777: Thomas Günther von Jagow
• 1777–1810: Georg Otto Friedrich von Jagow
• 1810–1840: Alexander Heinrich Hartwig von der Schulenburg

Verwaltungsgeschicht

In de Franzosentied von 1810 bet 1814 hett de Oort to de Mairie Parrns in’n Kanton Winsen höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör 1885 to de Vaagdie Parrns in dat Amt Winsen tohöört. Blots von 1852 bet 1859 hett de Oort kort to dat Amt Parrns höört. Na 1885 weer dat in’n Kreis Winsen. 1932 is dat Deel von’n Kreis Horborg worrn.

In de Midd von dat 19. Johrhunnert is de fröhere Domanialverband Fachenfelln Deel von de Gemeen Stell worrn. De Oort is an’n 1. Juli 1972 mit de Gemeenreform in Neddersassen Deel von de nu gröttere Gemeen Stell worrn.

Inwahnertall

Johr	Inwahners
1793-00-001793	8 Füürsteden
1824-00-001824	8 Füürsteden
1848-00-001848	40 Lüüd, 4 Hüüs
1871-12-011. Dezember 1871	41 Lüüd, 4 Hüüs

Religion

Fachenfelln is evangeelsch-luthersch präägt un höört to dat Kaspel von de Michaels-Kark in Stell. De Kark is 1868 boot un 1955 egenstännige Karkengemeen worrn. Vörher hett de Oort to dat Kaspel von de Gertrud-Kark in Parrns tohöört.

För de Kathoolschen is de Goden-Hirt-Kark in Winsen tostännig.

Weertschop un Infrastruktur

In’n Oosten von Fachenfelln liggt dat Steller Gewarvrebeed. Dat driggt den Naam Fachenfelln. 2013 is dat Rebeed üm 13 Parzellen op 4,5 Hektar na Westen hen utwiedt worrn. 2016/2017 schall tosätzlich op 17 Hektar dat ne’e Gewarvrebeed Fachenfelln-Süüd anleggt warrn.

Verkehr

An Fachenfelln langs löppt de Kreisstraat 86, de in’n Westen as K 10 na Maschen geiht un in’n Süüdoosten över Stell un Achterdiek na Winsen.

De nächste Autobahn is de Autobahn 39. De Opfohrt 2 Maschen liggt so twee Kilometer in’n Westen von Fachenfelln an de K 86/K 10. Över de A 39 un dat Maschener Krüüz besteiht ok Ansluss an de A 1 un A 7.

De nächste Bahnhoff is knapp dree Kilometer wied weg in’n Oosten de Bahnhoff Stell an de Bahnlien Hamborg–Hannover.