Wikipedia

Fargo (Film)

Filmdaten
Plattdüütsch Titel: —
Originaltitel: Fargo
Düütsch Titel: Fargo – Blutiger Schnee
Produkschoonsland: USA
Johr vun’t Rutkamen: 1996
Läng: 98 Minuten
Originalspraak: Engelsch
Öllersfreegaav in Düütschland: FSK 16
Filmkru
Speelbaas: Joel Coen
Dreihbook: Ethan Coen
Joel Coen
Produkschoon: Ethan Coen
Musik: Carter Burwell
Kamera: Roger Deakins
Snitt: Ethan Coen
Joel Coen
(als „Roderick Jaynes“)
Szenenbild: Rick Heinrichs
Kledaasch: Mary Zophres
Dorstellers

Fargo (dt. Titel: Fargo – Blutiger Schnee) is de Titel vun en US-amerikaanschen Thriller vun den Speelbaas Joel Coen, de tosamen mit sien Broder Ethan Coen ok dat Dreihbook bistüürt hett. De Hööftrull speel Joel Coen sien Fro Frances McDormand, de för ehr Dorstellen mit en Reeg vun Priesen – ünner annern mit den Oscar as beste Hööftdorstellersche – uttekent worrn is.

Inholt ännern

Jerry Lundegaard is Verkoopsleiter in en Autohuus in Minneapolis, dat sien dominanten Swiegervadder Wade Gustafson höört. Jerry hett bannig Lasten mit sien Finanzen, also hüürt he in Fargo mit Hülp vun den vörbestraaften Mitarbeiter Shep Proudfoot twee Verbrekers an, den stillen Gaear Grimsrud un den jibbeligen Carl Showalter, de de hele Tiet an’t Snacken is. Se schüllt Jerry sien Ehfro Jean „ahn bretale Gewalt“ roven, üm vun Swiegervadder en Löösgeld vun 80.000 US-Dollar aftopressen. För jemehrn Opdrag gifft he jem en Neewagen mit un seggt jüm butendem de Hälft vun dat Löösgeld to. In Wohrheit hett he aver vör, glieks ne hele Million vun sien rieken Swiegervadder aftopressen.

De Verbrekers sünd aver allns annere as fienföhlig bi jemehr Saak, man in’t Gegendeel groff un bretal. As se de Fro vun Lundegaard in jemehr Gewalt bröcht hebbt föhrt se mit ehr in en Versteek, en Ferienhuus wietaf an en See. Op de Fohrt warrt se nachts op en verlatene, eensame un versneete Straat vun de Polizei anhollen, vunwegen dat se ahn Kennteken föhrt. Showalter versöcht den Polizist to besteken. De will sik aver nich recht dorop inlaten, worophen Grimsrud em ahn Tögern bretal afknallen deit. Ok twee junge Lüdd, to dör en Tofall jüst vörbi föhrt un Tügen vun den Vörfall warrt, maakt he foorts an de Siet. De hoochswangere Polizeibaas’sche Marge Gunderson ut Brainerd fangt an, in den Fall natoforschen un to ermiddeln. De letzte Indrag vun den Polizist wiest ehr de eerste Spoor, de ehr na twee Horen föhrt, mit de sik de beiden Verbrekers vörher noch vergnöögt hebbt.

De herrschsüchtige Swiegervadder hollt vun Jerry so wenig, dat he dat Löösgeld sülvst övergeven will, vunwegen dat he Jerry dat nich totroet. Dat passt Jerry gor nich in’n Kraam, vunwegen dat he so nich den gröttsten Deel vun’t Geld an de Verbrekers vörbi vör sik behollen kann. Dör sien dominant Optreden an’n Oort vun de Övergaav provozeert Wade denn ok noch Showalter, so dat ok dor en Scheeteree bi rutsuurt. De Swiegervadder warrt dorbi drapen un blifft dood. Man, ok Showalter warrt dorbi in’t Gesicht drapen. De stellt nu aver fast, dat in’n Kuffer en hele Million Dollars binnen sünd. Dorvun vertellt he sien Kumpliezen aver nix, vunwegen dat he nu dat Geld överher nich deelen will.

Intwüschen hett Marge Gunderson de Spoor na de Möörders opnahmen, de se över jemehr Verbinnen to den Mechaniker Proudfoot un över dat Auto bit na’t Autohuus vun Lundegaard torüch verfolgen kann. Se verlangt vun Jerry, dat he en Inventur vun sien Autobestand maken deit. He kriggt dat aver mit de Nerven un neiht prompt ut. Dör Henwiesen vun en Barkeeper warrt de Polizei op dat Ferienhuus bröcht, woneem sik Grimsrud un Showalter versteken hebbt. Lundegaard sien Fro leevt inwtüschen nich mehr – de is vun Grimsrud ümbrocht worrn, vunwegen dat se em op de Nerven gahn is. As he un Carl sik wegen dat Auto un dat Geld in de Plünnen kriegt, maakt Grimsrud ok em an de Siet. Gunderson finnt em vör, as he Carl sien Liek jüst in en Goornschredder an de Siet maken deit – blots en Been kiekt noch rut. He warrt fastnahmen. Togliek warrt ok Lundegaard verhaft. He warrt vun de Polizei in en Motel överrascht.

Kritik ännern

  • Dat Lexikon vun’n internatschonalen Film beteken Fargo as en spannenden Thriller, de de Koumponenten vun dat Genre perfekt insetten deit, jüst so aver ok en Geföhl harr för Komik un snaaksche Begeevnissen. Butendem wies de Film en meist barmhartig Bild vun’t Land un sien Lüüd.[1]
  • TV Today meen, de Film weer en snaaksche Mischen vun Genres: op de een Siet swarten Humor un veel Blood, op de annern Siet wunnerschöne Biller. Verlerer-Typen, de een för sik innehmen doot, as ok de nüvere Polizistin möken den Film to en Highlight.
  • Urs Jenny schreev in Der Spiegel 46/1996, dat Fargo en Heimatfilm na all Regeln vun de Kunst weer un en Loov an dat Provinzielle vun dissen ,skandinavischen‘ Middelwesten. De Coen-Bröder harrn nienich en Geschicht mit so veel enkelte Aspekten un Leef, man ok so’n beten vun baven rünner, un so sütje un minschenfründlich vertellt.[2]

Utteken ännern

De Film Fargo weer utermatig spoodriek, wat sik ünner anners an de grote Tall vun Filmpriesen wiesen deit. Alltohopen weer de Film för 123 Filmpriesen vörslahn, dorünner alleen in söss Kategorien vun den Oscar. Wunnen hett he opletzt 71 Priesen, dorünner:

Achtergrünnen ännern

Feernsehreeg ännern

Een Jor na’t Rutkamen vun’n Film is en Pilotfolg för en Feernsehreeg dreiht worrn, mit de de Film wietermaakt warrn schüll. Edie Falco hett dorbi de Rull vun Marge Gunderson övernahmen. Matt Malloy speel ehrn Ehmann Norm Gunderson. De eenzige Schauspeler ut den Originalfilm weer Bruce Bohne as de Polizist Lou. Dat Dreihbook dorto is vun Bruce Paltrow un Robert Palm schreven worrn, Speelbaas weer Kathy Bates. As de Episood fardig weer, is aver keen Opdrag för de Feernsehreeg mehr kamen. De Pilotepisood is 2003 op dat Sennernettwark 'Trio in’n Rahmen vun en Reeg vun brillante Piltofilmen wiest worrn, de aver keen Spood harrn.[3]

Siet 2014 strahl nu de Feernsehsenner FX en Feernsehreeg ünner den glieken Titel ut, de vun MGM Television in opdrag geven worrn is. Se stellt en Mischen ut en ruge Adapschoon un Spin-off vun den Film dor. Dreihbookschriever vun all teihn Folgen weer Noah Hawley. De Produkschoon weer vun de Coen-Bröder as Executive Producers begleit. De Reeg ünnerscheedt sik düchtig vun de Filmvörlaag: Keeneen vun de Figuren warrt wedder opgrepen, un ok op den Inholt warrt nich wedder torüchgrepen. Veelmehr warrt in apen Enn ut den Film wedder opnahmen un wieterspunnen. In’n Juli 2014 is en tweete Staffel in Opdrag geeven worrn. De Reeg harr Spood un weer 18 mol för den Emmy nomineert.[4]

Anners wat ännern

Ofschoonst de Film sien Tiel von de Stadt Fargo (Noord-Dakota) hett, speelt de Film vör allen in’n US-Bundsstaat Minnesota, woneem de Coen-Bröder herkamt. De Stadt Fargo kummt in’n Film blots to Anfang kort vör.

An’n Anfang vun’n Film is en Inblennen to sehn. De beseggt, dat de Film op en wohr Begeevnis baseert un vun en Verbreken vertellt, dat 1987 in Minnesota passeert weer. Man harr op Wunsch vun de, de överleevt hebbt, de Naams ännert, man ut Respekt för de Doden weer de Geschicht so vertellt worrn, as se sik wohrhaftig todragen harr. Journalisten hebbt aver naforscht, so dat de Coen-Bröder opletzt in en Interview togeven hebbt, dat se sik dormit man blots en Spaaß maakt harrn. Wokeen nipp un nau keken hett, künn aver al in’n Afspann lesen, dat Ähnlichkeiten mit lebennige oder do’e Lüüd keen Afsicht wesen weer.

Borns ännern

  1. ↑ Kritiken to Fargo in’t Lexikon vun’n internatschonalen Film
  2. ↑ Urs Jenny: Stehauffrau greift durch. Spiegel Online
  3. ↑ The holy grail for FARGO fans: the 1997 T.V. pilot starring Edie Falco. vun Jan Bollen op bttcinema.com; afropen an’n 29. Dezember 2015
  4. ↑ Emmy Awards: Fargo

Weblenken ännern

Vun „https://nds.wikipedia.org/w/index.php?title=Fargo_(Film)&oldid=924735“