Fletigkeit
As Fletigkeit oder Fleetstoff warrt en sünnere Phaas betekend, de en cheemschen Stoff hebben kann. In fletige Oort hett de Stoff kumm Wedderstand gegen dat Verännern vun de butere Form, man en teemlich groten Weederstand gegen de Verännern vun’t Volumen, d. h. de Stoff is inkompressibel. Mit de Fastigkeit liggt disse Phaas twüschen das Gas un den Faststoff. Fletigkeiten un Gasen warrt ok tohopenfaat as so nöömte Fluiden, as se de Formverännerlichkeit gemeen hebbt.
De fletige Tostand vun en Stoff is aver nich jümmers gliek, man de hangt ok af vun’t butere Inwarken dör de Temperatur un den Druck. Wenn en Fletigkeit de Phaas ännert, nöömt man dat ok Phaasännern. Bi’n Övergang na’t Gas heet dat denn Verdampen (manch een seggt ok Kaaken), un bi den Övergang na’n fasten Stoff seggt man dorto Verklamen oder Freren.
Egenschoppen
ännern
Fletigkeiten ännert jemehr Volumen in Afhangigkeit vun de Temperatur. Disse Utdehnen kann över den Volumenutdehnkoeffizienten beschreven btw. quantifizeert warrn. Dat Kompressionsmodul kann as Maat nahmen warrn för de adiabatsch Volumenelastizität, oder eenfacher utdrückt: De gifft an, woveel man en Fletigkeit tohopendrücken kann.
Veele Egenschoppen laat sik dör de Molekulardynamik simuleeren.
In de Swoorlosigkeit, to’n Bispeel, wenn keen Kräft vun buten an’t Wark sünd, nehmt Fletigkeiten en kugelrunne Gestalt in vun wegen jemehr Böverflachenspannung.
Fletigkeiten öövt op de Wannen vun dat Fatt wo’t binnen is, en hydrostaatsch Druck ut. In Roh sünd Fletigkeiten vör allen dör dissen Druck kenntekend. Kummt aver vun buten noch Druck dorto, verdeelt sik de gliekmatig in de helen Fletigkeit. Duukt man en Saak in en Fletigkeit in, warrt de hydrostasch Druck op dissen Körper jümmer grötter, je deeper he induukt. Disse Druck hangt aver nich alleen vun den Deep af, man ok vun de Dicht vun de Fletigkeit.
Is de Fletigkeit nicht in Roh, man se ströömt, denn kommt noch annere physikalsch Grötten in’t Speel, de nipp un nau dör de Fluiddynamik beschreven un verklort warrt.