Frédéric Bazille
Frédéric Bazille oder ok Jean-Frédéric Bazille (* 6. Oktober 1841 in Montpellier, Languedoc-Roussillon; † 29. Oktober 1870 bi Beaune-la-Rolande, Region Centre) weer en franzööscher Maler un gellt as en vun de eerst Impressionisten. Bekannt is he för sien en plein air-Landschapen[1] un för Portraits.
Frédéric Bazille stamm ut en wohlhabend protestantsch Familie. Dör den Sammler Alfred Bruyas[2] hett he de Biller vun Eugène Delacroix un Gustave Courbet kennenlernt. Up Wunsch vun sien Vader studeer he 1860 tonächst Medizin,[3] keem 1862 nah Paris un fung an to malen. Sien aktiv Tiet weer up de acht Johr van 1862 bit to sien Dood begrenzt.
In de Hööftstadt studeer he bi Charles Gleyre un hett Pierre-Auguste Renoir kennenlernt, mit de he sück en Atelier deelt hett. Ok Claude Monet un Alfred Sisley hett he drapen un mit de tosommenarbeit. Bi Utflüüg nah Fontainebleau un nah Honfleur in de Normandie hebbt se faken in free Natuur malt un tekent.[4] Frédéric Bazille hett de befrüend Künstler ok finanziell ünnerstütt, sünners ok Monet.
1866 kunn he dat eerste Mal in den Pariser Salon utstellen. 1867 wurrn sien Biller torüchwiest, 1868 kunn he aber weer en Wark utstellen.
Bazille weer Musikliebhaber un hett Konzerte mit Warken vun Hector Berlioz, Richard Wagner, Ludwig van Beethoven un Robert Schumann besöcht.[5]
He deen siet August 1870 in en Zuaveneenheit in den Düütsch-Franzööschen Krieg 1870/71 un is bi Beaune-la-Rolande fallen.[6]
As en vun sien bekannst Warken gellt allgemeen Dat Familiendrapen van 1867, utstellt in dat Musée d'Orsay in Paris. Wiedere Biller befinnen sück in’ Besitt vun dat Musée Fabre in Montpellier, in’ Louvre, in dat Art Institute of Chicago un in tallriek wiederen Museen in de USA.
Up den Kunstmarkt wurrn 2004 bit to 5,3 Millionen US-Dollar för sien Biller bezahlt.[7]
Warken (Utwahl)
ännern-
Dat Familiendrapen (1867) -
Fischer mit Nett (1868) -
Sömmerszene (1869) -
Bazille sien Atelier in de Rue Condamine (1870)
Literatur
ännern- G. Poulain: Bazille et ses amis, Paris 1932
- J. P. Marandel, F. Bazille and Early Impressionism, Chicago 1978
- Dianne W. Pitman: Bazille: Purity, Pose and Paintings in the 1860s, University Park, Pennsylvania 1998, ISBN 0271017007
Weblenken
ännern
Emkeld Nahwiesen
ännern- ↑ Siet vun dat Wallraff-Richartz-Museum Köln, afroopen an’ 6. März 2011
- ↑ Siet vun dat Wallraff-Richartz-Museum Köln, afroopen an’ 6. März 2011
- ↑ Siet vun dat Wallraff-Richartz-Museum Köln, afroopen an’ 6. März 2011
- ↑ Siet vun dat Wallraff-Richartz-Museum Köln, afroopen an’ 6. März 2011
- ↑ Idrag up The Grove Dictionary of Art, afroopen an’ 6. März 2011
- ↑ Siet vun dat Wallraff-Richartz-Museum Köln, afroopen an’ 6. März 2011
- ↑ Siet vun en internatschonal Auktionshuus, afroopen an’ 6. März 2011