Frank James Marshall

Frank James Marshall (* 10. August 1877 in New York City; † 9. November 1944 ok dor) weer en US-amerikansch Schachspeler.

Frank James Marshall

Leven

Marshall is in Montréal upwussen, wo he ok dat Schachspeel lehrt hett. Later is de Familie nah New York översiedelt.

De internatschonale Dörbröök gelung Marshall in dat Johr 1900, as he in dat Meesterturnier vun Paris Emanuel Lasker slahn dee un tosommen mit Géza Maróczy den darten Platz vör Amos Burn, Michail Tschigorin, Georg Marco, Jacques Mieses, Carl Schlechter an annern deelen dee.

Tüschen 1909 un 1936 gull he as de best Speler vun de USA, wenn ok mit wesselhaft Leistungen. Sien wohl gröttste Erfolg in internatschonalen Turnieren weer de Sieg in Cambridge Springs 1904 vör Weltmeester Emanuel Lasker, den he sück bi en Wettkamp um de Schachweltmeesterschap in dat Johr 1907 allerdings düütlich, mit 3,5:11,5 (8 Nedderlagen, 7 Remis, 0 Siege) slahn geven muss. 1906 wunn he dat Meesterturnier in Nürnbarg (15. Kongress vun den Düütschen Schachbund), vör Oldrich Duras, 1908 dat Turnier in Düsseldörp (16. Kongress vun den DSB). vör Georg Salwe, Rudolf Spielmann un annern. 1936 geev he den Titel vun de Landsmeester vun de USA freewillig torüch, sien Nachfolger wurr Samuel Reshevsky.

Marshall harr den Roop, in sien Partien besünners gewitzte Opfer antobringen, man hett respektvull vun Marshall-Schwindeln snackt. Faken speel he Simultanturniere gegen Hobbyspeler. Bi allen veer Siegen vun de USA bi de Schacholympiaden in den 1930er Johren (1931 in Prag, 1933 in Folkestone, 1935 in Warschau un 1937 in Stockholm) weer Marshall mit dorbi, ebenso bi de Schacholympiade 1930 in Hamborg.

He is ok Grünner vun den anseggten un noch hüüd bestahn Marshall Chess Club in New York, de nah sien Dood vun sien Fru Carrie († 1971) leit wurr.

Nah hüm is en Variante vun de Spaansch Partie – de Marshall-Angreep, en scharp Gambit-Anspeel – nömmt wurrn, as ok de Marshall-Verteidigung in dat Damengambit. Buterdem hett he Gambitideen in de Franzöösch Verteidigung (1. e2-e4 e7-e6 2. d2-d4 d7-d5 3. Sb1-c3 c7-c5) un de Siziliaansch Verteidigung probeert (1. e2-e4 c7-c5 2. Sg1-f3 e7-e6 3. d2-d4 d7-d5).

Swaart an‘ Toog

In sien Partie gegen Stepan Lewizki in Breslau speel Marshall in dat Johr 1912 en vun de spektakulärsten Tüüg in de Schachhistorie:

Marshall harr in‘ letzten Toog Zug 22. … Th6xh3 speelt un en Figur wunnen, wiel de Toorn dör de drohen Gabel indirekt deckt is. De letzte Toog vun Witt weer nu 23. Te5-c5. Marshall as Swaart hett in‘ Momang en Figur mehr, aber wenn he sien Daam aftreckt, sekert de Angreep 24. Tc5-c7 Tf8-f7 25. Tc7-c8+ Tf7-f8 26. Tc8-c7 Stellungswedderhalen. Dat folg aber nu de spektakuläre Toog 23. … Dc3-g3 – dat droht Matt dör Dg3xh2. Witt kann de Daam nu up dree verscheeden Aarten slahn, verlüst aber in all Varianten: Up 24. h2xg3 sett Sd4-e2 sofort Matt, ok 24. f2xg3 verbütt sück wegen Matt in twee Tüüg (Sd4-e2+ 25. Kg1-h1 Tf8xf1#). Nah 24. Dg5xg3 folg Sd4-e2+ 25. Kg1-h1 Se2xg3+ 26. Kh1-g1 Sg3xf1 mit licht wunnen Stellung. Witt geev dorum up.

As Marshall sülvst in sien Autobiographie My fifty years of chess (1942) schrifft, weer de Tokiekers vun dissen Partiesluss so wat vun begeistert, dat se Goldmünten up dat Schachbrett smeeten hemm.

Dat Wark My fifty years of chess wurr allerdings vun den Ghostwriter Fred Reinfeld schreven. Kenner hemm nahderhen anmarkt, dat de Toog 23. … De3 ebenso wunnen harr.

Marshall harr een Söhn mit Naam Frank Rice.

Sien best historsch Elo-Tall weer 2762. De reck he in‘ Dezember 1917. Tietwielig leeg he up Platz 2 vun de Weltranglist.

Zitat

Vun Marshall in Engelsch: I have been playing chess for over fifty years. I started when I was ten years old, and I am still going strong. In all that time I don’t believe a day has gone by that I have not played at least one game of chess – and I still enjoy it as much as ever, meent up düütsch: Ik speel siet över 50 Johren Schach. Översett: Ik fung an in dat Öller vun teihn Johren, un ik speel immer noch good. In all de Tiet is, glööv ik, nich een Dag vergangen, an de ik nich wenigstens een Partie speelt harr – un ik magg dat immer noch as to’n Anfang.

Literatur

• Tim Hagemann: Frank James Marshall. Beyer, Hollfeld 1987 (Kleine Schachbücherei Band 23), ISBN 3-88805-073-1.
• Andrew Soltis: Frank Marshall, United States Chess Champion. McFarland, Jefferson 1994, ISBN 0-89950-887-1.
• John S. Hilbert: Young Marshall. Moravian Chess, Olomouc 2002, ISBN 80-7189-438-9.
• Marshall’s Chess “swindles”, comprising over one hundred and twenty-five of his best tournament and match games at chess, together with the annotation of the same; also an analysis of the queen’s side openings, with several king’s gambit novelties and a discussion of the principles of over-the-board chess. New York, American chess bulletin [1914].

Weblenken

Frank Marshall. Mehr Biller, Videos oder Audiodateien to’t Thema gifft dat bi Wikimedia Commons.

• Lütt Biografie und Partien up chessgames.com (engelsch)