Franz Caspar Schnitger

Franz Caspar Schnitger (* 15. Oktober 1693 in Neefeld; † 5. März 1729 in Zwolle) weer een Orgelboer.

He weer een vun de Söhns vun den famosen Arp Schnitger un een Broder vun Johann Georg Schnitger.

Dat kann seggt weern, datt düsse Orgeln vun em sünd:

• Vollenhove, 1720
• Zwolle (Michaelskarken), 1721, tosamen mit sien Broder nah Plaans vun sienen Vadder
• Alkmaar (Grote St.-Laurenzkarken), 1725
• Drobak in Norwegen, 1725
• Grunneng (St.-Martini-Karken), 1730. Hier hett he anfungen un de ole Orgel ümboot, man he kunn dor vunwegen sienen Dood nich mit to Enn kamen. Nah sienen Dood hett Albertus Antonius Hinsz (ok:Albert Antonius Hinsch) siene Warkstäe öbernahmen un denn ok de Arbeit an düsse Orgel in Grunneng to Enn bröcht.

In Alkmar hett Franz Caspar Schnitger up Andringen vun den Stadt-Orgelspeler Gerhardus Havingha eenen Verdrag mit de Stadt slaten, dat he de goot beropen Haghebeer-Orgel gründlich renoveren scholl. He hett dat so verstahn, datt he in den olen Kasten een ganz nee Orgel mit nu 56 Registers inboot hett. Up düsse Aart hett de dortiets moderne norddüütsche Orgeltyp sienen Intog nah Holland holen, nahdem he dör de Arbeiten vun Johann Caspar sienen Vadder Arp al bit nah de Provinz Grunneng kamen weer. Dat bedüde dat Enn vun de ole hollandsche Tradition vun den Orgelboo, besunners, as 1725 mit Johannes Duyschot de leste Verträder vun düsse Tradition sturben weer.