Friedrich von Mettenheimer

Friedrich Leopold Gustav Viktor von Mettenheimer (faken ok blots von Mettenheim nöömt; * 2. Oktober 1864 in Swerin; † 18. November 1932 in Eisleben) weer en düütschen Verwaltungsbeamten.

Von Mettenheimer is 1864 as Söhn von’n Dokter Carl Mettenheimer un Amalie Freiin Kolbe von Schreeb in Swerin boren. Sien Vader weer to de Tied de Dokter von Groothertog Friedrich Franz II. Friedrich von Mettenheimer weer op dat Fridericianum Swerin un hett later Juristeree studeert. He weer Regerungsassesser in Stood bevör he 1901 as Nafolger von Franz Heidmann kommissarsch Landraad von’n Kreis Rodenborg worrn is. 1902 hett he dat Amt kumplett övernahmen un is bet 1916 Landraad bleven. Denn hett he dat Amt an Heinrich von Müller afgeven un is as Nafolger von Karl von Wedel Landraad von’n Mansfeller Seekreis worrn. Dor is he bet 1926 bleven. In dat Johr is Wilhelm Fitzner sien Nafolger worrn un Mettenheimer is as Böverregerungsraad na Potsdam gahn. Dor weer he in’t Afdeel för Karken- un Schoolsaken. An’n 31. März 1930 is he in Rohstand gahn.

He hett an’n 20. Mai 1894 Olga von Bippen (* 5. Januar 1873; † 15. April 1961) freet. Siene Söhns weren Carl Friedrich von Mettenheimer (* 21. April 1901) un Heinrich Hermann Helmuth Philipp Gallus von Mettenheimer (* 27. Juli 1904).