Galaxy Quest
Galaxy Quest is de Titel vun en US-amerikaanschen Speelfilm ut dat Johr 1999. De Film is en Parodie op de Feernsehreeg Star Trek un annere Filmen ut dat Genre.
| Filmdaten | |
|---|---|
| Plattdüütsch Titel: | — |
| Originaltitel: | Galaxy Quest |
| Düütsch Titel: | Galaxy Quest – Planlos durchs Weltall |
| Produkschoonsland: | USA |
| Johr vun’t Rutkamen: | 1999 |
| Läng: | 102 Minuten |
| Originalspraak: | Engelsch |
| Öllersfreegaav in Düütschland: | FSK 12 |
| Filmkru | |
| Speelbaas: | Dean Parisot |
| Dreihbook: | David Howard, Robert Gordon |
| Produkschoon: | Mark Johnson, Charles Newirth |
| Musik: | David Newman |
| Kamera: | Jerzy Zielinski |
| Snitt: | Don Zimmerman |
| Dorstellers | |
| |
Inholt
ännernDe Film dreiht sik üm en Koppel vun Schauspelers, de to fröhere Tieten de Hööftrullen in de Science-Fiction-Reeg Galaxy Quest speelt heebt un sik nu mit Veranstalten för Fans (so nöömte Conventions) över Water hollen doot un nix anners mehr maakt, as Autogrammen to geven un jemehr Rullen wieter to spelen. De meisten Dorsteller sünd doröver teemlich gnegelig, blots Jason Nesmith, de as de Kaptein vun dat Ruumschipp in de Feernsehreeg de beste Rull harr, lett sik geern vun de Fangemeen fiern.
As he bi een vun de Conventions wies warrt, wat de Lüüd wohrhaftig vun jem denkt, neemlich dat se olle Knäst sünd, de keen richtige Rullen mehr kriegen doot un buten jemehr Rullen nix mehr bedüden doot. Ruchweg to de glieken Tiet warrt he vun en Koppel vun Lüüd ansnackt, de sik as „Termianers“ vörstellt, anföhrt vun Mathesar. Nesmith geiht dorvun ut, dat dat ok blots Anhangers vun de Feernsehreeg sünd un geiht to’n Spaaß dorop in, as de Termianers em fraggt, mit op jemehr Schipp to kamen. dor schall he mit en menschengliek Reptilwesen verhanneln, de in en Krieg gegen jem vörgeiht un jem tonichten maken will. De will vun jem den so nöömten Omega-13-Apparat hebben will, de in de letzten Folg vun de Feernsehreeg ansnackt worrn is.
An’n Vördag hett he teemlich en drunken hatt, un so kriggt de Schauspeler nich mit, dat he wohrhaftig op en richtig Ruumschipp bröcht warrt. In de Annahm, dat alles blots speelt is, gifft he de Terminaers de Order, op Sarris to scheten, üm dorna gau wedder torüch na de Eer torüch to kamen. Eerst as he mit en Gelantine övertogen warrt un dör’t Weltall torüchschickt warrt, warrt em klor, dat sien Beleevnis echt weer. Foorts neiht he los, üm sien Kollegen dorvun to vertellen, man de glöövt em dat eerst ok nich, vun wegen dat he jümmer noch besopen is.
Aver de Termianers kamt achteran. Se vertellt Nesmith, dat Sarris den Angreep överleeft hett, un fraagt em, of he torüchkamen kann, üm mit Sarris to verhanneln. Sien Kollegen hollt dat toeerst för Tüdelkram, överleggt sik dat denn aver doch, vun wegen dat se glöövt, dat dat üm en Opdrag geiht. AS se nakamt, is Nesmith al weg, man en Termianersche schickt jem op jemehr Reis. Nu markt ok se, dat de Geschicht nicht utfunnen weer.
As sik rutstellt, sünd de Termianers en freedvulle, naive Rass, de vör eenige Tiet en Problem mit jemehr Sellschopp hatt hebbt. Man se hebbt de Feernsehutstrahlen vun de Eer opfungen un hebbt dat för wohr hollen, wat se sehn hebbt, vun wegen dat se keen Vörstellen vun dat Kunzept Fikschoon un Schauspeleree hebbt. Se hebbt de Feernreeg dorüm as „histoorsche Opteken“ düüdt un dat Universum vun Galaxy Quest as Vörbild för jemehr Sellschop nahmen. All de Technologien, de in de Reeg nakamen sünd, hebbt se naboet.
Op een Slag mööt de Schauspelers nu jemehr Rullen spelen as in de Reeg, üm to överleven. Natürlich kamt se mit de Wirklichkeit nich so goot klor, as dat in’t Feernseh de Fall weer. As se vun Sarris angrepen warrt, neiht se ut, wobi dat Ruumschipp aver sworen Schaden nimmt. Se versöökt, op en Planeten Material tp’n Heelmaken to finnen, wat sik as teemlich gefährlich rutstellt. As se torüch op dat ruumschipp kamt, is dat Schipp aver jüst vun Sarris un sien Lüüd övernahmen worrn. Se warrt vun em dwungen, totogeven, wat dat mit de Galaxy Quest wohrhaftig op sik hett. Dorna gifft he Anwiesen, de Vörrichten to’n Sülvsttonichtenmaken to aktiveeren un de Schauspelers in’t Weltall ruttosleudern.
Nu warrt in de Schauspelers de Helden waak, de se in de Reeg speelt hebbt. mit en List doot se so, as wenn se Striet hebbt un künnt jümmer Wächters överraschen. För dat Afstellen vun’t Sülvsttonichtenmaken fehlt jem natürlich dat Weten. Aver Nesmith denk torüch, dat he bi de Convention mit en jungen Fan tosamenstött is, de veel över de Technik wüsst hett. As dorbi ut Versehn ok de Kommunikater vertuuscht worrn is, kann he mit den Jungen Kuntakt opnehmen un sik vun em verkloren laten, wat he to doon hett, üm dat Schipp un de Minschen dorop to redden. Ok de annern Kru-Liddmaten doot jemehrn Deel, üm dat Schipp wedder ut de Hannen vun de Reptilwesen freetokriegen. Se künnt woll flüchten, man wiet kamt se nich, vördem Sarris jem wedder inhollt.
Se künnt in letzte Sekunn dat Schipp vun Sarris dör en Minenfeld tonichten maken, man de kann sik jüst noch op dat Ruumschipp vun de Helden redden. Op dat Kommandodeck schallt he eenfach de Kru ut. Dor denkt Nesmith jüst noch doran, wat de Jung över den Omega-13-Apparat seggt hett, dat de mööglicherwies de Tiet üm 13 Sekunnen torüchdreihn kann. He lett den Apparat aktiveern un kann so de Gefahr afwennen. An’t Enn kamt se torüch op de Eer, woneem se mit dat Ruumschipp en teemlich harde Lannen hinleggt. Se kamt opletzt midden op de Bühne vun en Convention-Veranstalten to’n stahn, woneem se al so optreden schülln. Vun de Fans warrt se dorophen groot fiert.
Kritik
ännernLexikon vun’n internatschonalen Film: Vergnügliche Satire, die die Klischees und Konventionen des Genres persifliert und sie zugleich zum Prinzip der eigenen Dramaturgie macht.
Utteken
ännernDe Film weer för 21 Filmpriesen nomineert, wovun he sövern wunnen hett:
- 2000: den Saturn-Pries in de Kategorie Best Hööftdorsteller för Tim Allen.
- 2000: den Silver Scream Award för Dean Parisot.
- 2000: den Pegasus Audience Award för Dean Parisot.
- 2000: den Silver Raven in de Kategorie Best Dreihbook för David Howard.
- 2000: den Hugo Award in de Kategorie Best dramaatsch Vörföhren.
- 2000: den Nebula Award in de Kategorie Best Dreihbook för Robert Gordon un Davir Howard.
- 2001: den Hochi Film Award in de Kategorie Best utlännsch Film för Dean Parisot.
Anners wat
ännern- De Naam vun de Thermianersche, in de sik Tech Sgt. Chen verkieken deit, wrrt an’t Enn vun’n Film mit Jane Doe angeven. In de USA warrt dormit ok en Person betekent, vun de nich klor is, wokeen se is oder woneem se herkummt.
- Delen vun den Film sünd in’n Goblin Valley State Park in Utah dreiht worrn.
- De Musik stellt en Parodie op de Titelmelodie vun de Originalreeg vun Star Trek dor.
- De Film hett ruchweg 45 Millionen US-Dollar köst, aver weltwiet mehr as 90 Millionen US-Dollar inspeelt.[1]
Borns
ännernWeblenken
ännern- Galaxy Quest in de Internet Movie Database (engelsch)
- Kritik to de Filmmusik