Gauensiekersand

Wapen/Flagg	Koort
Basisdaten
Bundsland: Neddersassen Landkreis: Stood Gemeen: Drochters
Inwahners:
Postleettall:	21706
Vörwahl:	04143
Geograafsche Laag:	53° 43′ N, 9° 24′ O

Gauensiekersand (hoochdüütsch Gauensiekersand) is en Rebeed in de Gemeen Drochters in’n Landkreis Stood, Neddersassen, dat fröher en Insel in de Elv weer.

Geografie

Gauensiekersand liggt as Sand twüschen de Wischhobener Süderelv/Gauensieker Süderelv in’n Süüdwesten, de Gauensiekersand von’n fasten Wall aftrennt, un de Kruutsanner Binnenelv in’n Noordoosten, de den Sand von de Insel Kruutsand trennt. Von Aßlersand in’n Oosten is Gauensiekersand dör den Ruthenstroom trennt. Dat Rebeed tellt to Keden.

Gauensiekersand sülvs is dör dat Gauensieker Slüsenfleet in twee Delen deelt. Een gröttern in’n Noordwesten un een lütten in’n Süüdoosten.

En richtig Eiland is Gauensiekersand vondaag aver nich mehr. De Wischhobener Süderelv un de Kruutsanner Binnenelv sünd deelwies blots noch gröttere Gravens un dat Rebeed liggt kumplett binnen den Hauptdiek an de Elv. Bi Stormflood is dat Rebeed dör dat Ruthenstroom-Sparrwark un dat Sparrwark Wischhoben kumplett vör dat Water ut de Elv schuult.

De Naveröörd sünd Kruutsand in’n Noorden, Aßlersand un Ritsch in’n Süüdoosten, Gauensiek un Drochters in’n Süden, Theisbrügg un Nindörp in’n Süüdwesten un Doornbusch in’n Noordwesten.

Historie

Dat Gauensieker Slüsenfleet is 1836 anleggt worrn, üm den Togang na’n Drochterser un Gauensieker Haven to wohren.

Bevör na de Stormflood 1962 de Hauptdiek an de Elv un de Sparrwarken boot worrn sünd, hett dat keen Dieken geven, de Gauensiekersand schuult hebbt. Dat geev dor blots en Handvull enkelte Hüüs, de op Worten boot weren. An’t Enn von dat 19. Johrhunnert hett dat ölven Hööv geven, von de en Reeg mit de Tied aver verlaten worrn sünd. Vondaag bestaht noch fiev von de olen Hööv un een Huus, dat nee anleggt worrn is.

In de Johren 1970 weer för en Tied plaant, de Industrierebeden, de op Bützfletersand anleggt worrn sünd, ok op Aßlersand un Gauensiekersand uttodehnen. Dor is aver nix von worrn.

Verwaltungsgeschicht

De Oort hett vör 1859 to dat Amt Wischhoben tohöört un denn von 1859 bet 1885 to dat Amt Freeborg. Na 1885 weer dat in’n Kreis Keden. 1932 is dat Deel von’n Kreis Stood worrn.

In dat 19. Johrhunnert weer Gauensiekersand noch en egenstännige Buurschop, is later denn aver Deel von de Gemeen Drochters worrn. De Oort is an’n 1. Juli 1972 mit de Gemeenreform in Neddersassen Deel von de ne’e un noch gröttere Gemeen Drochters worrn.

Inwahnertall

Johr	Inwahners
1848-00-001848	22 Lüüd, 6 Hüüs
1871-12-011. Dezember 1871	64 Lüüd, 11 Hüüs

Religion

Gauensiekersand is evangeelsch-luthersch präägt un höört to dat Kaspel von de Johannis- un Katharinen-Kark in Drochters.

För de Kathoolschen is de Hillig-Geist-Kark in Stood tostännig.

Weertschop un Infrastruktur

Verkehr

Dör Gauensiekersand löppt de Kreisstraat 45, de in’n Noorden na Kruutsand geiht un in’n Süden na Drochters an de Landsstraat 111. Von de K 45 geiht in’n Noordoosten de Seglerstraat af, de na de Hatecke-Warft löppt.

De L 111 geiht in’n Noordwesten na Wischhoben, is dor mit de Bundsstraat 495 verbunnen un denn na Freeborg. In’n Süüdwesten löppt de L 111 na Aßel, Bützfleet un Stood.

De nächste Autobahn is de Autobahn 26 (Afsnidd Stood–Hamborg). De Opfohrt 3 Stood-Oost liggt so 21 Kilometer in’n Süüdoosten von Gauensiekersand an de L 111.

De nächste Bahnhoff is so bi 15 Kilometer wied weg in’n Süden de Bahnhoff Hammoh an de Nedderelvbahn. Von 1899 bet 1936 hett dat ok Personenverkehr op de Kedener Kreisbahn geven. De nächste Bahnhoff weer in Drochters.