Georgi Michailowitsch Gretschko

Georgi Michailowitsch Gretschko (russisch: Георгий Михайлович Гречко; * 25. Mai 1931 in Leningrad, Russische SFSR; † 8. April 2017 in Moskau) weer en sowjeetsch Kosmonaut.

Leven

Anfang vun sien Loopbahn

In den Wirren vun den Tweeten Weltkrieg hett Gretschko sien gesamte Kindheit in de Ukraine verbrocht un kehr eerst 1944 nah Leningrad torüch. He hett af 1949 in sien Heimatstadt dat Institut för Mechanik, dat he söss Johr later mit Utteknung afsluuten dee. Later kreeg he noch twee wieder Afslüsse: 1967 en Magister-Titel in Ingenieurwetenschapen un 1984 en Doktertitel in Physik un Mathematik.

1954 fung Gretschko as Mechaniker in dat Konstruktschonsbüro (OKB-1) vun Sergei Koroljow an to arbeiten. Af dat folgen Johr weer he dor as Ingenieur beschäftigt un hett de Floogbahnen vun Sputnik 1 as ok anner Satelliten un Ruumsonden berekent. He weer ok an dat Luna-Programm bedeeligt, besünners an de Maandsonden Luna 9 bit 13. Buterdem wurr hüm de Leitung vun en eegen OKB-Grupp överdragen.

Utwahl to’n Kosmonauten

Midden Mai 1964 hett Koroljow 14 Ingenieure vörslahn, de de Vörutsetten mitbringen deen, Kosmonauten to wurrn. Dorut gungen söss Kandidaten hervör, de to de intensiven medizinischen Tests schickt wurrn. In‘ Mai 1966 wurrn dree Mann utwählt (Wladislaw Wolkow, Waleri Kubassow un Gretschko), de sluutend Anfang September 1966 in dat „Sternenstädtchen“ bi Moskau mit de Grundutbillen anfungen.

Af Januar 1967 bill Gretschko gemeensam mit negen anner Kosmonauten (dorünner ok Juri Gagarin) en Grupp, de för en Floog to den Maand traineeren deen. He wurr aber in‘ April 1969 aftrucken un hett sück denn för en Insatz mit Sojus-Ruumscheep vörbereit. Nahdem he as Bordingenieur to de tweet Ersatzbesatten vun Sojus 6 un Sojus 7 hörrt harr, weer he tosommen mit Anatoli Filiptschenko, den Kommandanten vun Sojus 7, in de Ersatzmannschap vun Sojus 9 beropen wurrn.

Een Johr nah den Sojus-9-Floog, in‘ Juni 1971, hemm Gretschko un Filiptschenko för en Kopplungsfloog vun twee Sojus-Ruumscheep in de Eerdumloopbahn traineert. Dornah hett Gretschko de Kosmonauten betrüet, de de sowjeetsch Ruumstatschoon Saljut anfleegen sullen, bit he mit Alexei Gubarew to de Ersatzmannschap vun Sojus 12 hörr.

Sojus 17

Gretschko hett wiederhen mit Gubarew tosommen traineert, bit beid as Besatten för den Floog vun Sojus 17 bestimmt wurrn. Midden Januar 1975 sünd beid in Richt Saljut 4 start. Nahdem se andockt harrn, hemm se för meest een Maand an Bord vun de Statschoon leevt un arbeit. To de Forschungsarbeiten hemm astronoomsch un eerbeobachten Arbeiten hörrt. Disse eerste Floog to disse Ruumstatschoon gung nah 29 Daag to Enn, wat en nee sowjeetschen Langtietrekord dorstellen dee. De US-Amerikaner harrn dorgegen mit Skylab 4 meest dree Maand in en Ruumstatschoon tobrocht.

Sojus 26

Nah sien spoodriek Eerstinsatz hett sück Gretschko för wiedere Flüüg to en Ruumstatschoon vörbereit. Nah den scheefgahn Versöök vun en Kopplung vun Sojus 25 in‘ Oktober 1977 an Saljut 6 sull dat Gretschko mit sien nee Kommandanten Juri Romanenko bi den nächsten Floog twee Maand later aber gelingen.

Sojus 26 is an‘ 10. Dezember 1977 losflagen. 22 Stünn dornah hemm de beid Ruumfohrers an dat Heck vun Saljut 6 andockt. Se hemm aber bi en körten Utstieg aber kien Beschädigungen an den vörderen Andockstutzen sehn.

Nipp un nau een Maand nah hör Start reck Sojus 27 de Ruumstatschoon. Wladimir Dschanibekow un Oleg Makarow keemen as Besöök un hemm en nee Ruumschipp mitbrocht. Nah fiev Daag sünd de twee Gasten mit dat Sojus-26-Ruumschipp torüchflagen, Gretschko un Romanenko sünd dornah aber noch bit Enn‘ März an Bord vun de Ruumstatschoon bleven. As se weer up de Eer land weern, harrn se mit 96 Daag en nee Langtietrekord upstellt. Gretschko wurr mit nu 125 Daag in’t All de alleenige Rekordholler.

Oosprünglich weer Gretschko as Ersatzkommandant vun Sojus 31 vörsehn. He wurr aber vun den Interkosmos-Flug mit den Düütschen Sigmund Jähn aftrucken, wiel he sück bannig good mit den Kopplungsstutzen vun de Saljut-Statschoon utkennen dee.

Nah Sojus 26 hett Gretschko as Verbindungsspreeker in de Bodenkontrolle arbeit un hett af Harvst 1983 as Bordingenieur in de Ersatzbesatten vun Sojus T-11, mit Kommandant Anatoli Beresowoi un den indischen Forschungskosmonauten Ravish Malhotra traineert.

Sojus T-14

De dree Johr old Ruumstatschoon Saljut 7 harr siet dat Fröhjohr 1985 düchtig mit Energieproblemen to kämpen. In‘ Juni wurr mit Sojus T-13 en „Reparaturtrupp“ in den Orbit schickt. Dat Kosmonautenduo Wladimir Dschanibekow un Wiktor Sawinych sull de Statschoon weer arbeitsfähig maaken. Dree Maand later wurr Gretschko up sien dart un letzt Mission tosommen mit Kommandant Wladimir Wasjutin un Forschungskosmonaut Alexander Wolkow mit Sojus T-14 to de Ruumstatschoon Saljut 7 schickt. De Upgaav vun Gretschko bestunn blots dorin, de Arbeit vun Dschanibekow un Sawinych an de Statschoon ut Sicht vun en Ingenieur antokieken un de wiedere Floogtauglichkeit vun Saljut 7 fasttostellen. Nah blots een Week sünd he un Dschanibekow, de 112 Daag an Bord ween weer, weer to de Eer torüch.

Nah sien aktiv Tiet

Gretschko hett 1986 sien Kosmonautenloopbahn afslooten un nehm en Stäe in de sowjeetsch Akademie vun de Wetenschapen in Moskau an. He hett as Geophysiker in dat Institut för Atmosphärenphysik arbeit un weer dor maatgevend an de Entwicklung vun eenig Experimenten för de Ruumstatschoon Mir bedeeligt.

In‘ März 1992 hett Gretschko bi de Akademie kündigt un hett för twee Johr de Präsidentschap för Freeden un Versöhnung övernommen. Dorbi hannelt sück dat um en nichtstaatliche Organisatschoon mit Sitt in Moskau, de an de Freedenssekerheit arbeit. Siet sien Utscheeden weer he in Ruhestand.

Georgi Gretschko weer dreemal verheiraadt un harr twee utwussen Söhns ut sien eerst Ehe.

Utteknungen

Weblenken

spacefacts.de: Körtbiografie
space.kursknet.ru: Biografie (engelsch/russisch)