Good Swing

Dat Good Swing (hoochdüütsch Gut Schwinge) is en Eddelgood in Swing in de Gemeen Freenbeek (Samtgemeen Freenbeek) in’n Landkreis Stood, Neddersassen.

Historie

In de Swedentied hett 1652 de sweedsche Arvkämmerer un Präsident von de Hartogdömer Bremen un Veern, Alexander Erskein, dat Good kregen. He hett do ok dat Slott boot. Later is dat Good in’n Besitt von’n Riddmeester Hartwig Christophorus von Bülow övergahn, de Lucia Elisabeth von Erskein freet harr. 1736 keem dat Good för 10.666 Rieksdaler in’n Besitt von Heinrich von der Decken ut de Familie von der Decken.

1784 hett dat Amt Harsfeld de Gerichtsborkeit över Swing an de Herrn von dat Good Swing aftreden. Dormit is dat Gericht Swing begrünnt worrn. Dat Gericht hett bet 1850 bestahn, as dat Amt Stood-Gothenborg de Gerichtsborkeit övernahmen hett.

Bet in dat 19. Johrhunnert hett noch dat barocke Erskeinsche Slott stahn. Denn is en neet Goodshuus in’n klassizistischen Stil ut Tegelsteen mit tweeunhalv Etaaschen boot worrn.

To dat Good höört vondaag 100 Hektar Holt un 100 Hektar Wischen un Ackerland, de verpacht sünd.

Goodsherrn

• –1656: Alexander Erskein
• –1687: Alexander von Erskein
• –1692: Hartwig Christopher von Bülow
• Lud. von Bülow
• 1736–: Heinrich von der Decken

• –1794: Carl Heinrich von der Decken
• 1794–: Hedwig Elise von der Decken

• –1902: Carl Wilhelm Georg von der Decken
• –1955: Carl Friedrich Julius von der Decken
• 1955–1995: Thassilo von der Decken
• 1995–: Benedix von der Decken

Verwaltungsgeschicht

Dat Good hett vör 1784 to dat Amt Harsfeld tohöört, von 1784 bet 1850 to dat Gericht Swing un denn von 1850 bet 1859 to dat Amt Stood-Gothenborg. Von 1859 bet 1885 weer dat in dat Amt Himmelpoorten un na 1885 in’n Kreis Stood. 1932 is dat Deel von’n ne’en, grötteren Kreis Stood worrn.

Inwahnertall

Johr	Inwahners
1848-00-001848	11 Lüüd, 1 Huus

Religion

Dat Good Swing is evangeelsch-luthersch präägt un höört to dat Kaspel von de Petrus-Kark in Mulsen.