Graaf

Graaf, ok Greve, is en Titel vun den Adel. De oolthoochdüütschen Formen grafio un gravo un ok dat freesche un plattdüütsche greve kaamt woll över dat middellatiensche graffio ut dat byzantiensch-greeksche γραφεύς (grapheus). Dat heet: De Schriever. Dat eentlich latiensche Woort för Graaf is comes (franzöösch: comte, italieensch´: conte). Dat weer in de Tieden vun dat Röömsche Riek de Titel vun en hogen kaiserlichen Finanzbeamten (comes largitionum). Up Platt kümmt dat öllere Woort Greve an un for sik bloß noch bi den Diekgreven un, in Bremen tominnst, bi den Gohgreven vör. Sunst warrt tomeist dat Woort Graaf bruukt.

Titels as Landgraaf, Markgraaf un Palzgraaf sünd Förstentitel. In dat Hillge Röömsche Riek mütt se vun de Graafen/Greven unnerscheden weern un staht höger as de.

1919 sund de Adelstitels in Düütschland un in Öösterriek afschafft wurrn. In Düütschland is de vörmolige Adelstitel bloß noch Deel vun'n Tonaam. As Titel warrt he nich mehr ankeken. Vun 1919 af an warrt Graafen/Greven richtig anreedt na dat Muster: Vörnaam Graaf/Greve Tonaam. Dorbi warrt Graaf/Greve as Deel vun den Tonaam ankeken. Tomeist warrt avers eenfach seggt: Graaf/Greve Tonaam (sunner dat „vun“ un ohn Herr oder Fro). Vör 1919 hett de Adelstitel noch vör den Vörnaam stahn: Graaf/Greve Vörnaam Tonaam.