Höben

Op’n Höben in Brobargen weer fröher dat Goodshuus von de Eddelfamilie von Brobargen un vondaag steiht dor dat Fährhuus von de Brobarger Fähr över de Oost.

Blick op den Höben (vörn in’t Bild) un de Münn von de Meh (rechts)

Dat ole Goodshuus vör 1941

De Roland von Brobargen

De Prahmfähr in Brobargen

Naam

De Naam Höben kummt von’n Plural von Hoff. Fröher hebbt se dor Hollanner Höben to seggt. Vondaag warrt dat Woord aver normalerwies as Singular opfaat.

Historie

De Familie von Brobargen hett üm un bi 1280 an de Steed von’n Höben en Borg boot, de denn 1286 toeerst in de Oorkunnen vörkummt.

In’t Johr 1364 warrt dat eerste Maal seggt, dat in Brobargen en Kapell bestahn harr, de Kapell to’n hilligen Krüüz. De Kapell stünn beten na Süden to von de Borg op en Wort. An’n 28. Januar 1598 is denn en ne’e Kapell inwieht worrn. De Stifttafel, de Gotthard von Brobargen 1598 för de Kapell hett maken laten, hängt vondaag in de Michaeliskapell in Kronenborg, nadem de Kapell in’n Dörtigjohrigen Krieg toschannen gahn is.

1525 warrt in en Gerichtsakte seggt, dat för en poor Johren en Roland in Brobargen stahn hebben schull: Ist allda ufm Damm für wenig jaren ein geschnitztes Bilde gestanden, das man Rolandt geheißen, welches Leute noch gedenken können.

Dat Adelsslecht von Brobargen hett op dat Good seten, bet se 1618 dat Good verköpen müssen.

Bet to’n Dörtigjohrigen Krieg harr dat op’n Höben en Togbrügg över de Oost geven. De Truppen vun Tilly hebbt se woll üm 1628 afbrennt, üm en Angreep vun de Dänen tovör to kamen. Korte Tiet later hebbt se denn dat eerste Maal en Prahm bedreven, üm na de op de anner Siet Oost legen Feller to kamen.

De Höben is 1837 von de inheemschen Buern freeköfft un dat Land, dat dor bihöört hett, is opdeelt worrn.

Bet 1859 hett dat Brobarger Land op dat linke Över von de Oost to dat Amt Oosten tohöört. In dat Johr is dat denn in dat Amt Himmelpoorten wesselt. Dat Dörp Brobargen weer al vörher in dat Amt Himmelpoorten.

Dat Goodshuus weer brockfällig un is 1941 denn afreten worrn. Eerst 1956 is dat Fährhuus an de Steed von dat ole Goodshuus nee boot worrn. Vondaag warrt de Fähr kuum noch för de Bueree bruukt, man vör allen för den Tourismus. 2007 is güntsiet den Höben op de annere Sied von de Oost de Roland wedder nee opboot worrn, de dor in dat 16. Johrhunnert stahn hett.