Haschenfleth

Haschenfleth (hoochdüütsch Harschenfleth) weer en Vörstadt von de Stadt Stood.

Ansicht von Stood von Martin Weigel (1550); Haschenfleth links

Ansicht von Stood von Matthäus Merian (17. Johrhunnert); Haschenfleth links baven

Geografie

De Oort leeg in de Masch von de Swing un de Elv an’n Noordrand von Stood. Na Noorden slütt sik dat Land Keden an. Dat Water ut dat Rebeed flütt af över de Haschenflether Wetter hen na de Swing.

Na Noorden to legen de Öörd Schölisch, Snee, Hörn un Brunshusen.

Historie

Haschenfleth kummt 1275 as in Hersingvlete toeerst in de Oorkunnen vör. De Naam kummt wohrschienlich von en Personennaam Herso mit dat Suffix -ing un bedüüdt denn „de Fleet von Herso sien Lüüd“. Keramikfunnen düüdt dor aver op hen, dat dat Rebeed al in dat 9. Johrhunnert besiedelt weer.

Haschenfleth leeg buten von de Stadtbefestigung vör dat Haschenflether Door. Üm Haschenfleth rüm geev dat aver ok noch en Wall un de Weg an de Swing langs na Keden rut weer dör dat Steger Door sekert. Achter dat Door legen noch en poor Hüüs, de den Naam Steg dragen hebbt.

Dat Rebeed von Haschenfleth weer en Haven- un Spiekervörstadt, in de veel Hüüs mit dree Etaaschen stünnen. Ut dat Johr 1645 is överlevert, dat Haschenfleth 71 Hüüs harr. 31 legen op de Süüdoostsied von de Straat an de Swing langs un 30 an de Noordwestsied, achter de denn noch enkelte Hüüs un Goorns legen.

In’n Dörtigjohrigen Krieg is Haschenfleth in’n Februar 1645 von sweedsche Truppen tweimaakt un nich wedder opboot worrn.

1646 hebbt de Sweden de Koppel dörsteken laten, üm de Swing to begradigen. Dat ole Haschenfleth leeg also nich an’n Loop von de Swing, as wi em vondaag hebbt, man en Stück wieder in’n Westen.

1859 is op dat Rebeed von de Koppel dat Stoder Gaswark boot worrn un later ok en Tegelee. Dat Klärwark Stood is 1971 bet 1976 in dat Rebeed in’n Noorden von de Koppel anleggt worrn.

Religion

Haschenfleth hett to dat Kaspel von de Nicolaus-Kark in Stood tohöört.