Herbert Heinicke

Herbert Theodoro Heinicke (* 14. März 1905 in Porto Alegre, Brasilien; † 4. April 1988 in Hamborg) weer en düütsch Schachspeler.

Leven

Sien Kindheit hett Heinicke in Brasilien verbrocht, wo he as Söhn vun riek Grootgrundbesitter boren wurr. 1914 wurrn de Öllern vun Heinicke enteignet, un de Familie kehr nah Düütschland torüch, wo se tonächst in Wiesbaden, later in Arnstadt leev. He hett dat Gymnasium in Erfurt besöcht un 1924 sien Abitur maakt. En Studium kunn he aber wegen Geldmangel bi sien Öllern nich antreeden.

Ansluutend hett he in Hamborg en Banklehre maakt un as Angestellter bi en Koffie-Importfirma arbeit. Vun sien Arbeitgever finanziell unterstütt, hett Heinicke 1936 dat waagt, sück sülvstännig to maaken un hett denn en Firma för Edelstahl grünnd, de he bit in dat hooch Öller leiten dee.

1988 is he nah en Hartinfarkt storven.

Schachlich Werdegang

Heinicke hett in Arnstadt Schach vun den Anderssen-Schöler Fritz Riemann lehrt. Nahdem he nah Hamborg umtrucken weer, is he den Hamborger SK bitreeden, mit den he 1956 un 1958 Düütsch Mannschapsmeester wurr. 1972 weer he Grünnensliddmaat vun de Schachafdeelen vun den Ruder-Club Favorite Hammonia, de he bit to sien Dood anhörrn dee.

Heinicke hett nah eegen Angaven 17 Mal de Hamborger Meesterschap wunnen un nehm tüschen 1934 un 1970 an acht düütsch Meesterschapen deel. Sien gröttste Spood weer, dat he 1953 düütsch Viezmeester achter Wolfgang Unzicker wurr. Ok in internatschalen Turnieren hett he goot afsneeden (to‘n Bispeel Dart in Bad Elster 1939 achter Erich Eliskases un Josef Lokvenc, Turniersieg in Graz 1941, tweet Plätze in Ollnborg 1948 un Travemünn 1951), so dat he 1953 vun de FIDE to’n Internatschonalen Meester nömmt wurr. In München 1936 un Helsinki 1952 hett he de düütsch Mannschap up Schacholympiaden vertreede, doröver herut hörr he in mehreren Früendschapskämpen un bi de Europääsch Mannschapsmeesterschap 1957 to de düütsch Utwahl.

Ofschons sück Heinicke nich toletzt wegen sien Berop nah 1955 meest nich mehr an Turnieren bedeeligen dee, weer he bit in dat hooch Öller en stark Speler. Bit 1982 speel he mit de Mannschap vun de Schachafdeelen vun den Ruderclub Favorite Hammonia Hamborg in de eerst Bundsliga, van 1982 bit 1987 in de tweet Bundsliga.

Sien best historsch Elo-Tall bedroog 2588, de he in’n Dezember 1936 recken dee.

Sonstiges

Heinicke weer ok en aktiven Boxer un wurr düütsch Viezmeester in dat Lichtgewicht.

Literatur

• Herbert Heinicke: Kunst des Positionsspiels. Schach-Archiv, Hamborg 1981