Hollener Möhl
De Hollener Möhl is en fröhere Watermöhl an’n Hollener Möhlenbeek, de in de Meh münnt, un vondaag en Gasthuus bi Hollen in’n Süüdoosten von’n Landkreis Cuxhoben. De Möhl liggt twüschen Hollen in’n Noorden un Abbenseet in’n Süden an de Kreisstraat 32.
De Möhl kummt för 1646 as Besitt von de Familie von Brobargen toeerst in de Oorkunnen vör, hett do aver wööst legen. Wohrschienlich hett de eerste Möhl an’n Möhlenbrook an de hüdige Bundsstraat 495 stahn. De twete Naricht is denn von 1694. De Möller weer to de Tied Johann Postel. In de Oorkunn steiht in, dat ok al Johann Postel sien Vader Hinnerk un sien Grootvader Möller von de Hollener Möhl wesen sünd. An de Möhl is in en Balken de Tall 1645 rinsnittjert. Villicht is de Möhl in’n Dörtigjohrigen Krieg toschannen kamen un denn bald wedder opboot worrn. Na Johann Postel is de Möhl Anfang dat 18. Johrhunnert an de Familie Dohrmann kamen un 1821 an de Familie Waller. In de Midd von dat 18. Johrhunnert is de Möhl denn an de hüdige Steed an’n Dubben kamen un 1801 as ünnerslächtig Watermöhl noch ees wedder nee boot worrn. Von 1888 bet 1920 hett dat blangen de Watermöhl ok noch en Windmöhl geven. 1940 hett dat denn mit dat Koornmahlen ophöört. Na disse Tied weer dat man blots noch en Gasthuus. De ole Möhl is as Museumsmöhl herricht un löppt noch.
Von de Hollener Möhl kummt ok dat Möhlenrad in dat Wapen von de Gemeen Hollen un de hüdige Gemeen Hollnseth af.
Inwahnertall
ännern| Johr | Inwahners |
|---|---|
| 1848[1] | 15 Lüüd, 2 Hüüs |
| 1. Dezember 1885[2] | 3 Lüüd, 1 Huus |
Footnoten
ännern- ↑ Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 133
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 156
Weblenken
ännern- Websteed von dat Gasthuus (hoochdüütsch)
Koordinaten:53° 35′ N, 9° 6′ O