Muhammad Husni Mubarak

Muhammad Husni Mubarak, araabsch: محمد حسني مبارك, DMG Muḥammad Ḥusnī Mubārak, (* 4. Mai 1928 in Musaliha, Provinz al-Minufiyya; † 25. Februar 2020 in Kairo), weer en ägyptischen Politiker un vun 1981 bit 2011 Staatspräsident vun dat Land. He müss sien Amt opgeven as dat 2010/11 to’t so nöömte Araabsche Fröhjohr keem. Bi de Protesten sünd in Ägypten ruchweg 850 Lüüd ümkamen, as se demonstreert harrn. Wegen dat Anorden vun döödliche Gewalt gegen de Demonstranten is Mubarak Anfang Juni 2012 to en levenslange Haftstraaf veroordeelt worrn.

Husni Mubarak in’n März 2002

Leven un militäärsche Loopbahn

Mubarak is in de Sowjetunion to’n Fleger utbillt worrn un hett in’n Noordjemenitischen Börgerkrieg as Kampfleger deent. In’t Johr 1969 is he Baas vun’n Staff worrn un later harr he den Böverbefehl över de ägyptische Luftstrietmacht. In’n Jom-Kippur-Krieg hett Mubarak 1973 as Generalleutnant kämpt un is 1975 to’n Viezpräsidenten opstegen. Vun Anwar as-Sadat is he 1979 to de Fredensverhanneln mit Israel schickt worrn. As Sadat an de Siet maakt weer, is Mubarak an’n 14. Oktober 1981 Staats- un Ministerpräsident vun Ägypten worrn. Siet de Tiet regeert he dat Land in’n Utnahmtosand, den he jümmer wedder verlängert hett. Sien Amt as Ministerpräsident hett he in’n Januar 1982 wedder afgeven un den 11. Januar 2011 beendet

He un sien Fro Suzanne Mubarak, hebbt twee Söhnen (Alaa un Gamal Mubarak) un twee Enkelsöhnen. Gamal Mubarak warrt veel as tokamen Präsidenten vun Ägypten diskuteert.

Politik

De Rull vun Ägypten weer in de araabschen Welt swack worrn, as Sadat op Israel togahn is. Ünner Mubarak hett dat Land sien olle Rull as Föhrer binnen de araabschen Welt wedder torüchwunnen, ahn dorbi de pragmaatsche Instellen vun Ägypten in’n Fredensvörgang vun’n Negen Oosten optogeven.

Mubarak regeert autokraatsch un stüt sik op de Vertreders vun de „Dschil Uktubar“ („Oktobergeneratschoon“). De Grundlaag vun de Macht stellt bit vundaag de ägyptischen Armee dor, de sik as Wohrer vun’t natschonale Sülvstgeföhl, vun de Unafhangigkeit un vun de Bestännigkeit sütt. Siet Antreden vun sien Amt söcht Mubarak en Gliekgewicht twüschen de Ideologien un sozialen Gruppen un versöcht dormit sien Amt faster to maken. Üm islamistische Gegenströöm to bekämpen, hett he „Demokratie“ un „Pluralismus“ as Telen vun sien Regeren verkloort. Liekers gifft dat in Ägypten blots so veel Oppositschoon, as He Verlööf gifft. Sülvst dat Opstellen vun de Wahllisten vun de ägyptischen Volksvertreders mutt vun de präsidententroe Mehrheit in’t Parlament gootheten warrn. Dormit sünd as Oppositschoon also blots Kandidaten tolaten, de „vun Hand utsöcht“ sünd. Sien politischen Gegners snackt dorüm ok blots vun en Pseudo-Demokratie, vun wegen dat Mubarak wieter an sien diktatoorschen Regeerensstil fasthollt.

In sien eersten Amtsjohren hett he de Mööglichkeiten vun de Oppositschoon in Presse un Parlament düchtig utwiet. To glieken Tiet hett he de Allianz mit de konservativen Geistlichen vun de Al-Azhar-Universität oprecht hollen, vun wegen dat he op jemehr ruhig Inwirken boen dee. In de letzten Johren hett sik dat Regime an dat nasseritische Arv hollen. Dör dat Torüchwinnen vun de bedüden Rull vun Ägypten in de araabschen Welt hett dat Land an Vertroen wunnen. Dat de natschonalistische Porsitschoon teemlich wichtig is, sütt een an de apentliche Freid, wenn Mubarak mol kritische Wöör över de USA verkünnt oder sik feendlich gegen Israel wiest.

Mubarak bi en Reed in’n Mai 2008

In de Binnenpolitik kunzentreert sik sien Regeeren op dat Anstöten vun de Weertschop, üm de sozialen Problemen in’t Land bekämpen to künnen. De Wedderstand vun radikale Islamisten vun de Muslimbröderschop gegen de Politik vun’t Moderniseeren warrt ünnerdrückt. Man, siet de 1990er Johren geev dat fakener al Terroranslääg vun islamistische Extremisten gegen den Tourismus, gegen Kopten un gegen staatliche Amtsdräger, so ok gegen Mubarak sülvst. Siet 2000 hett sik de binnenpolitische Druck vergröttert, as de ägyptische Weertschop nich in de Gäng kummt un de för dat Land wichtige Tourismus dör de Terroranslääg in Gefohr is. Een vun de Anslääg schüll Mubarak sülvst drapen: An’n 26. Juni 1995 is sien Wagenkolonn op de Fohrt na’n Drapen vun de Organisatschoon för Afrikaansche Eenheit (OAU) in de äthiopischen Hööftstadt Addis Abeba beschaten worrn. Em is dorbi aver nix passeert.

An’n 20. November 2003 hett Mubarak wiel en Reed in’t Parlament vör Millionen vun Tokiekers in’n Feernsehn en Swäckanfall hett un is ahnmächtig worrn.

Na en Verfatenstosatz hett dat 2005 in Ägypten to’n eersten mol en Präösidentschopswahl mit mehrere Kandidaten geven. An der Wahl hebbt sik blots 23 % vun de Wahlberechtigten bedeeligt un bito weer vun Manipulatschonen snackt. Na offizielle Angaven is Mubarak mit 88 Prozent vun de Stimmen för en föffte Amtstiet wählt worrn.

Nahdem dat över länger Tiet jümmer mehr Protest in Ägypten gegen Mubarak geven hett, is he an’n 11. Februar 2011 denn vun sien Amt torüchtreden. Mööglich is ok, dat dat Militär dor Druck maakt harr. In’n Mai 2011 is Mubarak denn offiziell anklaagt worrn, dat he mitverantwoortlich weer, dat bi de Demonstratschonen in Ägypten mehr as 800 Lüüd doodbleven sünd. Ok wegen Korrupschoon weer gegen em Klaag föhrt, jüst so ok gegen twee vun sien Söhnen, de aver freespraken worrn sünd.

Gegen Husni Mubarak weer an’n 2. Juni 2012 denn en levenslange Haftstraaf utsproken, vun wegen dat nawiest weer, dat he de Gewalt gegen de Demonstranten anordent harr. De Klaag wegen Korrupschoon is fallen laten worrn. Mubarak is an’n 20. Februar 2020 in en Militär-Krankenhuus in Kairo doodbleven.

Weblenken

Muhammad Husni Mubarak. Mehr Biller, Videos oder Audiodateien to’t Thema gifft dat bi Wikimedia Commons.

• Literatur vun un över Husni Mubarak in’n Kataloog vun de Düütschen Natschonalbökeree