Inders in Belize
De Inders in Belize sünd een von de Volksgruppen von dat Land Belize. Se höört as Ünnergrupp to de Indo-Karibiers un stammt von de Inders af.
In Belize warrt se mehrstendeels East Indians nöömt, dat dat nich mit de West Indians verwesselt warrt, also be Bewahners von de Westindischen Eilannen.
Na’n Zensus 2010 sünd vun de Inwahners 6486 oder 2,1 % Inders.[1] Bi düsse Tall fehlt noch de Lüüd, de sik to mehr as een Grupp torekent, wat de Zensus aver nich exakt utwiest. Bi’n Zensus 2000 weren dat noch 6868 Lüüd.[1] Dorto mutt noch seggt warrn, dat de Zensus von 2010 ok de ethnische Kategorie Hindu kennt hett, de dat in’n Zensus von 2000 nich geven hett. As Hindu hebbt sik 587 Lüüd betekent. Düsse Tallen tohooprekent, weren 2,3 % Inders.
De Inders verdeelt sik över all Distrikte von Belize. In’n Distrikt Belize leevt de gröttste Grupp un in’n Distrikt Orange Walk de lüttste Grupp.
Historie
ännernDe eersten Inders kemen 1857 as Arbeiders na Brietsch-Honduras. Se kemen ut Jamaika un weren dor vörher Indentur-Arbeiders. Nadem de Indentur-Verdrag utlopen weer, sünd se as Arbeiders wiedertagen. De Arbeiders in dat 19. Johrhunnert sünd vör allen na’n Noorden un Süden von Belize kamen, wo se op de Plantaaschen (vör allen Zuckerrohr) arbeidt hebbt. Öörd mit en groten Andeel Inders sünd vondaag to’n Bispeel Forest Home un Mafredi. De Herkumstrebeden in Indien legen vör allen in Bhojpur un Awadh. Ok von Koffie-Plantaaschen ut Guatemala kemen Inders.
Düsse Grupp is vondaag deep in de Sellschop von Belize integreert un snackt Engelsch. De gröttste Deel von de Inders in Belize stammt von düsse Grupp af.
Vele indische Naams sünd in de Karibik verengelscht worrn. To’n Bispeel is ut’n indischen Naam Tulsi de Naam Tulcey worrn.
Von’n 7. bet 9. September 1907 keem dat in Vancouver to de Anti-Oriental Riots, in de sik Witte gegen Inwannerers ut Japan, China un Indien richten deen. As Naklapp von düsse Opstänn hett de Regeren von Kanada inn November 1907 en Delegatschoon na Brietsch-Honduras schickt, to de James Bernard Harkin, William C. Hopkinson un Teja Singh tohöört hebbt un de utkunnen schull, wat se dor nich överleidige Inders henbringen kunnen. De Regeren von Kanada wull de Inders looswarrn, aver besünners de negative Bericht von Teja Singh hett dorto föhrt, dat de Plaans nich wiederverfolgt worrn sünd.
Dat gifft aver ok üm un bi 500 Lüüd, de eerst in dat 20. Johrhunnert direkt ut Indien (vör allen Sindhis) kemen un vondaag vör allen as lüttje Händlers un Hökers arbeidt.
In dat Johr 1999 hett sik dat East Indian Council billt, dat de Intressen von de Inders in Belize vertriddt.
Religion
ännern
De Inders, de as Indentur-Arbeiders in de Karibik kemen, sünd vondaag to’n allergröttsten Deel Christen von verscheden Denominatschonen.
Indische Hindus, Buddhisten un Moslems gaht op Inwannerers direkt ut Indien in dat 20. un 21. Johrhunnert trügg.
Von de Religion her weren in dat Johr 2010 in Belize 612 Lüüd Hindus.[1] Dat gifft en Hindu-Tempel an de Albert Street in Belize-Stadt. De Hindus verehrt besünners Jhulelal, wat de böverste hinduistische Goddheit von de Sindhis is un ok de Schutzgodd von Lüüd, de op See gaht oder na Översee.
De Grupp von de Buddhisten weer 2010 757 Lüüd groot.[1]
Ok Moslems weren mank de Inders. Stand 2010 geev dat 577 Moslems in Belize.[1] Düsse Grupp ümfaat aver ok Lüüd, de ut araabsche Lannen kemen oder Maten von de Nation of Islam. De indischen Moslems sünd blots en lüttje Ünnergrupp.
Lüüd
ännernTo de Grupp von de Inders in Belize höört to’n Bispeel de Generaal Cedric Borland, de Jurist George Singh un de Politiker Doug Singh. Ok de eenzige Fro, de in de Geschicht von Belize henricht worrn is, Nora Parham, hett to de Inders in Belize höört.
Literatur
ännern- Bismark Ranguy, Kathryn Staiano-Ross: Tales from a forgotten place. Dept. of Anthropology, University of Kansas, 2003