Jürgen Prieß

Jürgen Heinrich Theodor Prieß (* 30. Januar 1929 in Swerin; † 12. Februar 2016 in Bremerhoben) weer en düütschen Verwaltungsbeamten.

Böverkreisdirektor Jürgen H. Th. Prieß

Prieß is 1929 as Söhn von Otto Prieß in Swerin boren. He güng vör’n Tweten Weltkrieg in Stettin un Güstrow na School. Na’n Krieg keem he na Oterndörp. Dor is sien Vader 1946 Stadtdirekter worrn. Prieß hett sien Abitur an dat Athenaeum in Stood maakt. He hett denn in Stood en Banklehr bi de Volksbank Stood maakt un Rechts- un Staatswetenschoppen an de Universitäten Hamborg un Freiburg studeert. He weer Referendar in Winsen, Kiel, Stood, Basbeek, Bremerhoben, Speyer un Celle un hett 1958 sien Grote Staatsprüfung in Hannover maakt. He hett denn in de Verwaltung bi’n Regerungspräsident in Stood, dat Binnenministerium von Neddersassen un bi’n Verwaltungsbezirk Bruunswiek arbeidt. As Kreisoberrat is he an’n 1. Januar 1966 bi’n Landkreis Wersermünn Vertreder von Böverkreisdirekter Ernst Klemeyer worrn.

He is 1969 Böverkreisdirekter von’n Landkreis Wersermünn worrn un weer dat bet 1977, as de Landkreis Wersermünn oplööst un Deel von’n Landkreis Cuxhoben worrn is. Von’n Landkreis Cuxhoben weer he denn von 1977 bet to sien Rohstand 1992 ok Böverkreisdirekter. Sien Nafolger weer Johannes Höppner.

1995 hett he för sien kulturpolietsche Verdeensten den Hermann-Allmers-Pries kregen. Ok den Ehrenring von’n Landkreis Cuxhoben driggt he un an’n 6. Januar 1992 hett he dat Grote Verdeenstkrüüz von dat Land Neddersassen kregen.

He weer verheiraadt mit Gisela Prieß (borene Hahn), de Tähndokter weer. De beiden harrn dree Kinner.