Wikipedia

Janine Elizabeth Coye-Felson

Janine Elizabeth Coye-Felson (* in Belize-Stadt) is en Diplomatin ut Belize.

Janine Coye is as Dochter von Janie un Rudolph Coye in Belize-Stadt boren. Se hett von 1992 bet 1994 en Bachelor of Arts an de Saint Louis University (St. Louis, Missouri, USA) maakt un denn von 1994 bet 1997 en Dokter in Juristeree an de University of Wisconsin-Madison in Madison (Wisconsin, USA). Tosätzlich hett se 1997/1998 dat Certificate of Legal Education von de Norman Manley Law School in Kingston (Jamaika) kregen.[1] Se is in Wisconsin un Belize as Avkaat tolaten. Se hett 1998 as Juristin bi dat Butenministerium von Belize anfungen.[2]

In dat Johr 2000 hett se anfungen, as Minister-Counsellor bi de Stännige Mission von Belize bi de Vereenten Natschonen in New York City to arbeiden.[2] Nadem Butenminister Godfrey Smith an’n 10. Mai 2005 beslaten hett, dat Stuart Leslie sien Amt as Stännigen Vertreder von Belize bi de Vereenten Natschonen afgeven mutt, hett Coye-Felson as tweet-ranghööchste Diplomatin dat Leid över de UN-Mission in New York övernahmen.[3] Dat weer toeerst övergangswies, is denn aver länger ween. Se weer Geschäftsdregerin. 2008 schull Lois Young as Stännige Vertrederin beropen warrn. Se hett dat Amt aver nich aktiv övernahmen un Coye-Felson is Baadschopperin worrn un bet 2012 Stännige Vertrederin bleven. In dat Johr hett Lois Young denn doch aktiv dat Amt opnahmen.[4] Coye-Felson is in de UN-Mission bleven, weer nu aver blots noch Viez un Geschäftsdregerin.

Se is Viez-Vörsitterin von de Alliance of Small Island States.

Se is verheiraadt mit Alexander Jacob „Alex“ Felson (* 18. Juni 1971). De beiden hebbt dree Kinner un leevt in Wooster Square (New Haven, Connecticut).[5]

Footnoten

ännern
  1. ↑ Speaker Bio, Making Every Life Count: A Dialogue on Unpacking the Data Revolution at the Country Level
  2. ↑ a b Keynotes, 2019 SDLAC Conference
  3. ↑ U.N. Ambassador fired; not loyal enough to minister?, Channel 5 Belize an’n 11. Mai 2005
  4. ↑ New Diplomatic Appointments for Foreign Offices, Channel 5 Belize an’n 3. April 2012
  5. ↑ Familie von Nancy Felson
  De Artikel „Janine Elizabeth Coye-Felson“ is een exklusiven Artikel up de Plattdüütsche Wikiepdia. In anner Spraakuutgaven is de nich to finnen.
 
 Dat lett so, as wenn disse Artikel nich so akraat is as de ween schull.

Kiek up Wikipedia:Pleeg, daar to diskuteren, wat verbetert oder ännert warrn mott.

Vun „https://nds.wikipedia.org/w/index.php?title=Janine_Elizabeth_Coye-Felson&oldid=1026696“