Johann Christian Friedrich Eisendecher
Johann Christian Friedrich Eisendecher (* 30. Oktober 1774 in Hannover; † 1842) weer en düütschen Verwaltungsbeamten.
Eisendecher is 1774 as Söhn von Maria Sophia Luise, borene Iffland (1747–1823; en Süster to August Wilhelm Iffland), un Wilhelm Christian Eisendecher (1741–1804) in Hannover boren un an’n 3. November döfft worrn.[1][2] He is an’n 2. September 1787 ehrenhalver an de Universität Göttingen immatrikuleert worrn.[1] An’n 10. November 1792 hett he sik richtig an de Universität inschreven un Juristeree studeert.[1] 1795 hett he sien Afsluss maakt[1] un is denn in’n hannöverschen Staatsdeenst gahn. He weer 1798/1799 Auditer bi dat Amt Otterbarg.[1] 1800 is he as Auditer in dat Amt Lüchow gahn un dor 1801 bet 1803 Amtsschriever supernumerär ween.[1]
He is in de Tied von dat Königriek Westfalen 1810 Ünnerpräfekt von’n Distrikt Neenborg worrn.[3]
1818 is he Amtmann von dat Amt Emden worrn un 1819 tosätzlich Stadtkommissar.[1] 1836 is he denn as Amtmann in dat Amt Niestadt wesselt un hett dor 1839 den Rang von en Oberamtmann kregen.[1]
Christian Carl Philipp Eisendecher (üm 1805–na 1857), de later ok Amtmann weer, is sien Söhn ween.