Jorge Espat

Jorge Luis Espat (* 10. September 1959) is en Politiker ut Belize (PUP, UDP).

Espat is 1959 boren. Mark Espat is sien Broder. Espat weer op de Holy Redeemer Primary School un denn op dat St. John’s College in Belize-Stadt. He hett an de Viterbo University in La Crosse (USA) studeert un dor in’n Mai 1984 en Bachelor of Science in Business Management maakt. He hett denn wieder an de Fordham University in New York studeert un dat Studium in’n Mai 1987 mit en Master of Science in International Political Economy and Development afslaten. He is Schoolmeester an dat St. John’s College.

In’n Dezember 1992 müss Derek Aikman wegen Bankrott sien Mandaat in dat Repräsentantenhuus von Belize afgeven. Dorüm hett dat an’n 27. Januar 1993 en Nawahl in’n Wahlkreis Freetown geven. Bi düsse Nawahl weer Espat Kannedaat för de People’s United Party (PUP) un hett de Wahl mit 67,86 % von de Stimmen gegen Howell Longsworth von de UDP un Adelma Broaster von de NABR wunnen.

Bi de reguläre Parlamentswahl in Belize 1993 weer he in’n sülven Wahlkreis Kannedaat un hett de Wahl mit 61,5 % von de Stimmen gegen Owen Morrison von de UDP wunnen. Ok bi de Wahl 1998 kunn he sik mit 71,81 % gegen Marisa Marisol Quan von de UDP un Abel J. Rodriguez von de PDP dörsetten.

Dormit weer he von Januar 1993 bet 5. März 2003 Afornten von dat Repräsentantenhuus von Belize. De eersten fiev Johr hett he mit de PUP in de Oppositschoon seten. Na de Wahl 1998 is he ünner Premierminister Said Musa denn Minister för Natschonale Sekerheit (mit Tostännigkeit för Immigratschoon) in dat Kabinett Musa I ween.

An’n 28. April 2000 müss Espat aver de Tostännigkeit för Immigratschoon an Maxwell Samuels afgeven, is dorför aver tosätzlich Minister för Weertschopliche Entwicklung worrn.

An’n 15. Oktober 2001 hett Espat denn al siene Ministerämter afgeven.

Von 1996 bet 2001 weer Espat ok Vörsitter von de PUP.

2013 is Espat Maat von de United Democratic Party (UDP) worrn.