Maxwell Samuels

Maxwell Ewing „Max“ Samuels (* 18. September 1940; † 28. April 2014 in Belize-Stadt) weer en Politiker ut Belize (PUP).

Leven

Samuels is 1940 boren. He hett dat St. Michael’s College besöcht un weer von 1959 af an Polizeibeamten. He is op dat Police Staff College in Bramshill (Grootbritannien) utbillt worrn. He weer von 1981 bet 1986 Commissioner of Police bi dat Belize Police Department.

He weer siet 1962 verheiraadt mit siene Fro Salome.

Samuels is an’n 28. April 2014 in en Krankenhuus in Belize-Stadt doodbleven. En poor Daag vörher harr he en Lungenembolie.

Politik

Samuels weer Maat von de People’s United Party (PUP) un von 1994 bet 1996 ok Vörsitter von de Partei.

Bi de Parlamentswahl in Belize 1993 weer he Kannedaat för de PUP in’n Wahlkreis Belize-Land Noord un hett de Wahl mit 50,1 % von de Stimmen knapp gegen Samuel Rhaburn von de UDP wunnen. Ok bi de Wahlen 1998 (52,15 % von de Stimmen gegen Denton Belisle, UDP, un Estevan Perrera, PDP) un 2003 (53,45 % gegen Felix Sutherland, UDP) hett he sik in’n sülven Wahlkreis wedder dörsett.

Dormit weer he von’n 30. Juni 1993 bet 7. Februar 2008 Afornten von dat Repräsentantenhuus von Belize. De eersten fiev Johren hett he mit de PUP in de Oppositschoon seten. An’n 31. August 1998 is he ünner Premierminister Said Musa Minister för Apentliche Versorgung, Verkehr un Kommunikatschoon worrn.

An’n 28. April 2000 hett Samuels de Tostännigkeit för Immigratschoon von Jorge Espat övernahmen.

An’n 15. Oktober 2001 is Samuels Binnenminister worrn, de för Polizei, Immigratschoon un Fängnisse tostännig weer.

In’n August 2002 hett Samuels dat Amt as Binnenminister an Ralph Fonseca afgeven, nadem dat Irregularitäten bi de Vergaav von Visa geven hett. Premierminister Musa hett em denn den Posten as Minister för Kommunikatschoon, Verkehr un Apentliche Versorgung geven.