Karl von Buchka (Politiker)

Karl Hermann Fritz Ferdinand von Buchka (* 23. September 1885 in Göttingen; † 11. Februar 1960 in Freeborg) weer en düütschen Politiker von de DVP, NSDAP un CDU.

Von Buchka is 1885 as Söhn von Adelheid, borene von Plato, un den Chemiker Karl von Buchka in Göttingen boren. He weer op Gymnasium in Göttingen un Berlin un hett Juristeree an de Universität Göttingen studeert. He weer dor siet 1904 Liddmaat von dat Corps Bremensia. Buchka hett 1907 sien Dokterarbeid över dat Thema In welchem Verhältnisse steht der Paragraph 119, Abs. 2 BGB zu den §§ 459-464, 538, 539 BGB? schreven un is 1905 Rechtsreferendar worrn. 1907 weer he Gerichtsreferendar in Spandau, 1909 Regerungsreferendar bi de Regerung in Oppeln un von 1913 af an Regerungsassesser in Blomendal, Trier, Wirsitz un Auerk. He weer in’n Eersten Weltkrieg von 1914 bet 1917 Soldaat. In disse Tied harr he as Nafolger von Magnus von Braun vertredungswies ok dat Amt as Landraad von’n Kreis Wirsitz. 1917 hett denn Kurt Baron von Stempel dat Amt övernahmen.

Nadem Paul Berthold 1917 doodbleven is, hett Buchka sien Amt as Landraad von’n Kreis Blomendal övernahmen. He weer dat von 1917 bet 1920. In disse Tied is Buchka na de Novemberrevolutschoon an’n 11. Januar 1919 för korte Tied dör den Arbeider- un Soldatenraad as Landraad afsett worrn, hett dat Amt denn aver wedderkregen. Sien Nafolger as Landraad weer Ludwig Christians. In’n Juni 1920 is he Regerungsraad in Auerk worrn. He is dor aver man blots en korte Tied ween. Al an’n 10. Juli 1921 güng Buchka as Landraad in’n Kreis Keden, de in Freeborg sitten dee. Dor is he bet to’n 31. August 1932 bleven un weer de letzte Landraad von dissen Kreis, de to’n 1. Oktober 1932 mit’n Kreis Jörk un den Kreis Stood to’n ne’en Kreis Stood tohoopgahn is. Buchka hett as liberalen Landraad gullen un weer bi de DVP.

An’n 1. September 1932 hett Buchka dat Amt as Landraad von’n Kreis Goldap in Oostprüßen von sien Vörgänger Hans Berner övernahmen. 1933 is he Maat von de NSDAP worrn (Liddmatennummer 1.683.854). He weer ok Obertruppführer bi’n Staff von de SA-Standarte 44.

Buchka weer 1939 Mitrutgever von dat Heimatbuch des Kreises Goldap. 1943/1944 hett he vertredungswies ok dat Amt as Landraad von’n Landkreis Sudauen övernahmen. In Goldap is he bet 1945 Landraad bleven. He weer aver toletzt Soldaat in’n Tweten Weltkrieg un keem in brietsche Kriegsfungenschop. 1946 is he wedder freekamen un güng na Freeborg. Dor is he 1948 in de CDU ringahn. Bet 1950 harr Buchka keen Stellung. Bi de CDU is Buchka 1950 Vörsitter von’n Bezirksverband Stood worrn. Dat Amt harr he bet 1954. He weer Landsvörsitter för Neddersassen in de Kommunalpolitische Vereinigung von de CDU.

Von 1949 bet 1956 weer Buchka Afornten in’n Kreisdag von’n Landkreis Stood un Viez-Landraad. De Patenschop twüschen Landkreis Stood un Kreisgemeenschop Goldap (Maat von de Landsmannschop Oostpreußen), de 1952 slaten worrn is, geiht to en groten Deel op em trügg.

In Düütschen Bundsdag weer he von 1953 bet 1957 (2. Wahlperiood). He is dor över de Landslist Neddersassen intagen. Dor weer he von’n 8. Mai 1956 bet 1957 Viez-Vörsitter von’n Sünnerutschuss för dat Beraden von dat Waterhuusholtsgesett.

Buchka is Ehrenliddmaat von de Kreisgemeenschop Goldap.

Warken

• In welchem Verhältnisse steht der Paragraph 119, Abs. 2 BGB zu den §§ 459-464, 538, 539 BGB? Dokterarbeid, Göttingen 1907
• Karl von Buchka/Willi Lemke (Rutgevers): Heimatbuch des Kreises Goldap. Insterborg 1939