Paul Berthold

Ernst Hugo Paul Berthold (* 30. Juni 1855 in Spandau; † 29. August 1917 in Blomendal) weer en düütschen Verwaltungsbeamten.

Berthold is 1855 in Spandau boren un in Meideborg un Hannover opwussen. Na de Schooltied hett he Juristeree un Volksweertschop an de Universitäten Heidelberg un Göttingen studeert. Na en poor Statschonen in de prüüßsche Verwaltung keem he 1884 na dat Amt Blomendal. As de Kreis Blomendal 1885 nee billt worrn is, is he dor de eerste Landraad worrn. Mit dit Amt weren ok dat Amt as Strandhauptmann von Blomendal un de Liddmaatschop in’n hannöverschen Provinzialutschuss verbunnen. He harr dat Amt as Landraad bet to sien Dood 1917. Sien Nafolger weer Karl von Buchka.

De Verband von de Bogenossenschaften von Düütschland, den he mit grünnt hett, hett em to’n Vörsitter maakt.

De Kaiser hett em 1905 de höögste Utteeknung för sozialpolietsche Verdeensten geven, den Willem-Orden.

In Fähr-Lobbendörp is de Berthold-Straat na em nöömt un in Lüßum de Landraad-Berthold-Straat. Ok de Bertholdshöhe driggt sien Naam. 1961 is von de GEWOSIE för em en Gedenksteen op de Bahrsplaat opstellt worrn.

Literatur

• Wilhelm Lührs: Berthold, Ernst Hugo Paul. In: Historische Gesellschaft Bremen, Staatsarchiv Bremen (Hrsg.): Bremische Biographie 1912-1962. Hauschild, Bremen 1969, S.38 (Sp.1) bis S.39 (Sp.1).