Karlheinz Poredda

Karlheinz Poredda (* 12. Januar 1920 in Lyck, Masuren; † 15. März 2012) weer en düütschen Politiker.

Poredda dee ut Neumalken in Masuren stammen. In’n Tweten Weltkrieg weer he Soldaat an de Oostfront, in Frankriek un in Afrika un keem bi de Amerikners in Fungenschop. Na Masuren kunn he 1948 na Krieg un Fungenschop nich mehr trügg un keem denn över en Verwandten, de in dat Sperrtüügamt Op de Hööv arbeiden dee, na Hipst. He hett von 1957 bet 1985 as Verwaltungsanstellten in dat Depot in Heesdörp arbeidt.

In Hipst hett he sik in de Kommunalpolitik ünner annern för de Rechten von de Verdrevenen insett un weer Maat von’n Bund von de Heimatverdrevenen un Entrechteten. 1948 keem he de eerste Tuur in’n Gemeenraad un is 1961 Börgermeester von Hipst worrn. He hett 1971 de Wählergemeenschop Fre’e Börger (WFB) mit grünnt un weer von 1977 bet 2011 in’n Kreisdag von’n Landkreis Rodenborg un von 1974 bet 2011 in’n Raad von de Samtgemeen Geestborn.

As Poredda 2011 sien Amt as Börgermeester von Hipst an Gerhard Oetjen afgeven hett, weer he mit 50 Amtsjohren de deenstöllste un togliek mit 91 Johr ok öllste Börgermeester in ganz Düütschland.

Poredda weer siet 1967 verheiraadt un hett een Söhn.

Ehren

Poredda hett 1988 dat Bundsverdeenstkrüüz an’t Band un 2009 dat Bundsverdeenstkrüüz 1. Klass kregen. 2001 hett he ok dat Verdeenstkrüüz von’n Neddersassischen Verdeenstorden an’t Band kregen. 1992 hett he de Ehrenmedallj von’n Landsverband Neddersassen von’n Städer- un Gemeendag wunnen. Nadem Poredda 2011 sien Amt as Börgermeester von Hipst afgeven hett, hett em de Gemeenraad an’n 20. Januar 2012 to’n Ehrenbörgermeester von de Gemeen Hipst maakt.