Klauenkäver

Bi den Klauenkäver (Timarcha tenebricosa) hannelt sik dat üm en Käver ut de Familie vun de Blattkävers (Chrysomelidae).

Klauenkäver

Systematik

Klass:	Insekten (Insecta)
Ünnerklass:	Fleeginsekten (Pterygota)
Böverornen:	Neeflunken (Neoptera)
Ornen:	Kävers (Coleoptera)
Ünnerornen:	Polyphaga
Familie:	Blattkävers (Chrysomelidae)
Geslecht:	Timarcha
Oort:	Klauenkäver (Timarcha tenebricosa)

Wetenschoplich Naam

Timarcha tenebricosa

Fabricius, 1775

Kennteken

De Kävers weert över’t Lief 15 bit 20 Millimeters lang un sünd dor de gröttsten Blattkävers in Middeleuropa mit. Dat Lief is swatt un glimmert dor en beten blau bi. Se laat na Schietkleiers. De Deekflunken sünd in’e Midden tohopenwussen, vundeswegen könnt Klauenkävers nich flegen. Se sünd an’e Böversieten nich glatt, man en beten gnubbelig, as wenn dor lüttje Löcker oder Kuhlen in sitten döen. De Föhlspriete sünd man dannig un bestaht ut en ganze Reeg vun Le’e, de all kogelrund sünd. De Been loopt ut in dree korte, man breede Le’e, mit en smaller Footlidd doran. Tolest kummt den noch en Paar Krallen. Vun düsse dicken Fööt hett de Käver sien Naam vun her.

Wie se leven doot

De Kävers sünd wat traag un langsam, man al fröh in’t Vörjohr sünd se togange. Hen un wenn kaamt se ok in milde Winterdage rut. Wenn se stöört weert, wöörgt se en roden oder orangen Fleetstoff ut (Reflexblöden). Normolerwiese leggt de Seken ehre Eier in’e Sommertied in Bettstroh-Planten (Galium) af. Dor freet de Budden un ok de Kävers vun. Man ok in’t Vörjohr oder in’n Harvst paart sik de Kävers. Denn kruupt de Budden in’t neegste Vörjohr ut. Se weert bit hen to 20 Millimeters lang un sünd ok swatt mit en plump un wat kogelhaftig Lief. Verpoppen doot se sik in’e Eer. De Kävers överwintert.

Wo se vörkamen doot

De Kävers sünd in Süüd- un Middeleuropa up warme Dröögwischen, sunnerlich in’e Barge antodrepen. Roor sünd se nich.

Literatur

Michael Chinery: Pareys Buch der Insekten. Ein Feldführer der europäischen Insekten. Verlag Paul Parey, Hamborg u. Berlin 2004, ISBN 3-440-09969-5

Weblenken

Klauenkäver (Timarcha tenebricosa). Mehr Biller, Videos oder Audiodateien to’t Thema gifft dat bi Wikimedia Commons.