Leevfroon-Kapell

De Leevfroon-Kapell weer en röömsch-kathoolsche Kapell op de Worth in dat Dekanat Bremerhoben von dat Bisdom Hilmssen. Ehren Naam hett se na’n Marientitel Uns leve Fro.

De Kapell leeg in de Straat Leevfroontrift 2. Dor weer de ole Volksschool op de Worth. As 1961 de ne’e School trech worrn is, hebbt se de ole Volksschool afreten. Blots de 2. Klass, de in en Anbo ut dat Johr 1928 ünnerbröcht weer, hebbt se stahn laten. Dor is denn in de Johren 1960 de kathoolsche Kapell in inricht worrn. Över de Döör is en Toorn ut Beton boot worrn. In den Toorn schull ok en Klock inboot warrn, aver dor is nix na kamen.

De Kark is an’t Enn von de Johren 1980 profaneert worrn un de Toorn is afreten worrn. 1995 hett de Stadt Cuxhoben dat Huus köfft un an den Geschichts- un Heimatvereen Worth afgeven. Nadem dat ümboot worrn is, warrt dat nu Worth-Huus nöömt un as Utstellungs- un Arbeidsrüüm bruukt.

Vondaag is de Twölv-Apostels-Kark in Olenwoold (Karkengemeen St. Marien in Cuxhoben) de nächste kathoolsche Kark, de so bi negen Kilometer weg is. De Worth höört nu to disse Karkengemeen.