Twölv-Apostels-Kark (Olenwoold)

De Twölv-Apostels-Kark is en röömsch-kathoolsche Kark an de Robert-Koch-Strat 16 in Olenwoold. Se höört to de Karkengemeen St. Marien in dat Dekanat Bremerhoben binnen dat Bisdom Hilmssen. In de Kark hebbt so bi 140 Lüüd Platz.

Historie

De Grundsteen för de Kark is in’n Dezember 1968 leggt worrn. An’n 6. September 1969 is se von Bischop Heinrich Maria Janssen wieht worrn. To de Tied hebbt in dat Rebeed 1006 Katholiken leevt, de vörher von de Karken in Cuxhoben (Hart Jesu un St. Marien) un de Hillig-Krüüz-Kark in Oterndörp betreut worrn sünd. An’n 1. Juli 1988 is de Kark egenstännige Karkengemeen worrn (dat heet, dat ut de Parrvikarie en Parrkuratie worrn is). 1992 hebbt se dat Gebüüd utboot un dat hett tosätzliche Gemeenrüüm kregen.

An’n 31. August 2008 hett de Kark ehr Egenstännigkeit wedder verloren un is mit de St.-Marien-Kark to een Karkengemeen tohoopleggt worrn.

Rebeed

In de Tied von 1988 bet 2008 as de Kark en egen Karkengemeen billt hett, hebbt to disse Karkengemeen de Öörd Olenwoold mit Franzenborg und Godendörp, Olenbrook, de Worth, Berensch, Arensch un Ox (höört all to de Gemeen Cuxhoben) un dat kumplette Rebeed von de Gemenen Noordholt, Millm un Cappel (vondaag all Deel von de Gemeen Geestland) tohöört.

Pastoorn

• 28. April 1968–: Gregor Hoffmann