Liefkreisloop

De Liefkreisloop is de Deel vun’n Bloodkreisloop, de den Lief mit Blood versorgt. De annere grote Deel is de Lungenkreisloop, de för den Gasuttuusch in de Lungen tostännig is.

Schema vun’t Hart: De böveren Twiegen versorgt den Kopp un de böveren Leden, de ünneren den Buukruum (Abdomen) un de ünneren Leden. De annern Bloodfatten billt Lungenkreisloop.

De Liefkreisloop hett sien Anfang in de linken Hartkamer, wo dat suerstoffrieke Blood, dat vun de Lung kamen is, in de Aorta utsmeten warrt. Dat is de grote Slagader vun’n Lief. Vun ehr twiegt all de anneren groten Slagadern af. Se deelt sik in lüttere Arterien, welke dat Blood in de verschedenen Rebeden vun’n Lief transporteeren doot. De lütten Twiegen dorvun warrt ok as Arteriolen betekent, se gaht denn över in de noch lütteren Kapillaren.

In de Kapillaren finnt de Stoffuttuusch statt: Suerstoff un Nehrstoffen warrt an de Zellen afgeven un de Endprodukten vun’n Stoffwessel warrt vun’t Blood opnahmen un aftransporteert. De Kapillaren sünd togliek ok Verbinnen twüschen de Arterien un de Venen, se gaht neemlich in de Venolen över, wat fiene Bloodadern sünd, de dat suerstoffarme Blood na den Stoffuttuusch wedder sammelt. Se verbinnt sik denn to de grötteren Venen, de wieterhen in de bövere oder ünner Hollveen inmünnt. De beiden Hollvenen transporteert dat Blood wedder torüch un münnt in den rechten Vörhoff vun’t Hart.