Luise Kummer
Luise Kummer (* 29. Juni 1993 in Jena) is en ehmalge düütsch Biathletin.
Sportliche Loopbahn ännern
Luise Kummer fung nah de Grundschool mit den Biathlonsport an. 2007 wessel se vun dat Goethegymnasium Ilmenau up dat Sportgymnasium Oberhof, wo se denn ok hör Abitur maakt hett. Siet 2012 hörrt se to den D/C-Kader vun de düütsch Biathlon-Mannschap an. 2014 wurr se in de Lehrgangsgrupp Ia upnommen un keem ok in den B-Kader.
Hör internatschonal Debüt geev de Sportsuldatin bi dat Europääsch Olympisch Winter-Jöögdfestival 2011 in Liberec. Dor hett se mit en teihnten Platz in' Sprint un Rang 13 in' Eenzel up sück upmarksom maakt. Hör Europacup-Debüt geev se 2014 in Ridnaun-Val Ridanna mit en 54. Platz in' Sprint. Hör best Europacup-Ergevnis schaff se in Ruhpolding, wo se den 21. Platz recken dee.
Bi de Biathlon-Juniorenweltmeesterschapen 2014 in Presque Isle wunn se nah en achten Platz in' Sprint Sülver in de Verfolgung. In' Eenzel un de Staffel wunn se de Goldmedaille. Wegen disse Ergevnisse wurr se bi den Weltcup in Oslo insett. In' Sprint verpass se dor aber mit Rang 82 de ansluuten Verfolgung.
Nah good Leistungen in' IBU-Cup wurr Kummer för den Weltcup-Auftakt 2014/15 in Östersund nomineert.[1] Hier reck se ahn Scheetfehler hör bit dorhen best Karriere-Resultat mit den 18. Platz in' Eenzel. Dat weer sogor noch beter as hör best IBU-Cup-Ergevnis. Bi dat Staffelrennen in Hochfilzen gelung hör tosommen mit Franziska Hildebrand, Vanessa Hinz un Franziska Preuß hör eerst Weltcupsieg. Bi den Weltcup in Antholz gelung hör dank fehlerfree un flink Scheetinlagen 13. Platz in' Sprint. In dat ansluuten Staffelrennen hett se tosommen mit Franziska Hildebrand, Franziska Preuß un Laura Dahlmeier hör tweeten Weltcupsieg schafft. In de Verfolgung vun den Weltcup in Nové Město na Moravě gelung hör trotz schlecht Bedingungen en twalft Platz, womit se ok de Norm för de Weltmeesterschaen in dat finnisch Kontiolahti recken dee. An’ 19. Februar wurr se offiziell för hör eerst WM as fievte Fru nomineert. Dor wurr se as Startlöperin vun de Mixed-Staffel sösste.
An’ 20. März 2015 reck se bi dat Sprintrennen bi dat Weltcup-Finale as Achte hör bit dorhen best Platzeeren in en Weltcup-Rennen. In de ansluuten Verfolgung keem se up Platz 15 un kunn sück dormit eerstmals för en Massenstart qualifizeeren. An dat Enn' vun de Saison keem se up Rang 34 in den Gesamt-Weltcup.
En Operatschoon an Teenen un en Infekt hemm dorto führt, dat se sück nich för de Weltcup-Mannschap für de Saison 2015/16 qualifizeeren kunn un gung dorför in den IBU-Cup an den Start. Se keem aber in Canmore in Kanada doch to en Weltcup-Insatz un reck in’ Sprint Platz 14 un weer dormit vör Veronika Vítková un Laura Dahlmeier. An dat Enn' vun de Saison harr se Platz 60 in den Gesamt-Weltcup reckt.
Bi de Biathlon-Europameesterschapen 2016 in dat russisch Tjumen wunn se de Goldmedaille in' Massenstart (vör Paulína Fialková un Ingrid Landmark Tandrevold) un gemeensam mit Matthias Dorfer de Sülvermedaille in de Single-Mixed-Staffel. In den Sprint keem se dorto up Rang 9 un kunn sück in de Verfolgung noch up Rang 7 verbetern.
To Anfang vun de Saison 2016/17 hett se sück nah dat eerst Rennen vun den IBU-Cup to en Trainingspaus entslooten, dorto keem nahderhen noch, dat se sück bi'd Joggen besehrt hett un sück en Anreet vun dat Butenband totrecken dee.
2019 hett se hör Loopbahn afslooten.