Bi Lungensweer oder Pneumonie (lat. Pneumonia vun ooldgr. πνεύμων Pneumon=Lung) hannelt sik dat um en Sweer vun dat Geweev vun de Lung. De Sweer kann up bloß een Siet (unilateral) oder up beide Sieten (bilateral) uptreden un kann vunwegen en sunnerlichen Umstand (akut[1]) oder duerhaftig [2] tostanne kamen. Meist warrt se utlööst vunwegen en Infektschoon mit Bakterien, Viren oder Swämme, man dat kann ok cheemsche Grünne geven, as Inhalatschoon vun giftige Stoffe. Ok wenn suern Magenssapp in’n falschen Hals kummt oder wenn en Allergie vörliggen deit, kann dat to en Lungensweer kamen.

Lungensweer, mit Unnertitels

Wie se indeelt warrt un wat för Grünne dat gifft ännern

Vunwegen datt dat man swaar is, de Lungensweer na ehren Erreger in to delen (Bakterien, de in de Zellen sitten doot, as Rickettsien un Chlamydien, Viren, Mykoplasmen, allerhand Aarden vun Swämme, de up den Minschen losgaht, Protozoen, Wörmer), hett sik en annere Klassifikatschoon dörsetten konnt, de dor ok för wichtig is, wie de Sweer wieter unnersocht (Diagnose) un behannelt (Therapie) weern kann:

Primäre un sekundäre Lungensweer ännern

Wenn en gesunnen Minsch en Lungensweer kriggt, ohn dat bi em sunnerlich Risiko bestahn deit vunwegen bestimmte Faktoren, denn warrt vun en primäre Pneumonie snackt. Gegen de primäre Pneumonie över hannelt sik dat bi en sekundäre Pneumonie um en Sweer, för de dat bi den Kranken en Dispositschoon gifft oder wo anners wart passeert is, wat de Krankheit utlösen deit. Bi primäre Lungensweren sünd tomeist Pneumokokken, Staphylokokken, Haemophilus influenzae, Mykoplasmen, Chlamydien, Legionellen un Viren, as dat Grippevirus, Adenovirus un Parainfluenzaviren de Grund. Achter sekundäre Lungensweren staht faken annere Erregers: Herpesviren (CMV, HSV), Swämme, Pneumocystis jirovecii, Protozoen (Toxoplasmose) un ok anaerobe Bakterien.

Belege ännern

  1. Pneumonia acuta.
  2. Pneumonia chronica bzw. Pneumonia recidiva.