Dit Woort hett noch annere Bedüden: kiek dorför ünner Machaquilá.

Machakilha oder ok Hicatee is en Oort in’n Distrikt Toledo von Belize. In dat Dörp leevt vör allen Maya von dat Volk von de Kekchí.[1] De Oort hett 105 Inwahners.[2]

Geografie ännern

De Oort liggt an’n Hicatee Creek un dicht an’n San Pedro River, de en poor Kilometer wieder in’n Süden in’n Sarstoon River münnt. Dat Dörp is blots dree Kilometer von de Grenz na Guatemala af, liekers gifft dat keen offiziellen Weg, de över de Grenz föhrt.

De Öörd ümto sünd Dolores un Otoxha in’n Noorden, Crique Sarco in’n Noordoosten, Graham Creek in’n Oosten, Chocón un Modesto Méndez in’n Süüdwesten un Quebrada Seca un Timax in’n Noordwesten.

Historie ännern

De Lüüd von Machakilha kemen 1925 ut Machaquilá in Guatemala.[1] Dat Rebeed hett to dat traditschonelle Land von de Kekchí höört un de Lüüd hebbt sik dorüm nich üm de Staatsgrenz scheert. Dör den unklärten Status wat Staatsbörgerschop un Landrechten angeiht, keem dat an’n 23. Februar 1997 to en Vörfall, bi den Soldaten von de Belize Defence Forces versöcht hebbt, Bewahners von dat Land to verdrieven.[1]

Weertschop un Infrastruktur ännern

De Minschen in dat Dörp leevt all von de Bueree.[2] Dör de aflegen Laag gifft dat anners keen Weertschop.[2] Dat gifft ok keen fleten Water oder Gesundheitsversorgung un de Oort is nich an dat Elektrizitätsnett anslaten.[2] Dat gifft aver Photovoltaik-Anlagen, de in en begrenzten Rahmen för Stroom sorgt.

Verkehr ännern

De eenzige Weg rut ut Machakilha is en Footpadd na Dolores.[2] Von dor föhrt en Straat över Otoxha na Corazon. Över en Reeg annere Dörper kummt een denn na Jacintoville an’n Southern Highway.

De nächste Flegerplatz is de Punta Gorda Airport in Punta Gorda.

Scholen ännern

De Oort hett en egen Grundschool, de von de röömsch-kathoolsche Kark bedreven warrt. Düsse School is 1985 inricht worrn.[3] De ölleren Kinner mööt jeden Dag to Foot na Dolores, wat söss Kilometer wied weg is, un denn wieder na Corazon.[2]

Footnoten ännern

  1. a b c Maya Atlas: The Struggle to Preserve Maya Land in Southern Belize. North Atlantic Books, Berkeley 1997, Sied 69
  2. a b c d e f Machakilha – No Road and No Access to Bare Essentials, Channel 5 Belize an’n 6. Mai 2019
  3. St. Peter Claver Parish


Koordinaten:15° 56′ N, 89° 11′ W