Kekchí (Volk)

De Kekchí oder Q’eqchi’ sünd en Volk in Guatemala un Belize, dat to de gröttere Grupp von de Maya-Völker höört. Lüttjere Gruppen leevt ok in El Salvador un Mexiko.

Schoolkinner in Belize, de to de Volksgrupp höört

Rebeed

Dat Rebeed, in dat de Kekchí leevt, liggt twüschen de Maya-Bargen in’n Noorden, de Küst von’n Golf von Honduras in’n Oosten, de Cerro San Gil in’n Süüdoosten, de Sierra de las Minas in’n Süden un de Sierra de Chuacús un Sierra de los Cuchumatanes in’n Westen.

In Belize kaamt de 17.409 Kekchí (Stand Zensus 2010) in verscheden Dörper von’n Distrikt Toledo (Stand 2010 13.691 Lüüd) vör. Gröttere Gruppen leevt ok in de Distrikte Stann Creek (1333 Lüüd), Cayo (1408 Lüüd) un Belize (837 Lüüd). Verstreit in de annern twee Distrikte von Belize hebbt Stand 2010 140 Lüüd leevt, de sik as Kekchí identifizeert hebbt. Dormit weren 5,7 % von de Inwahners von Belize Kekchí.

In Guatemala leevt de 852.012 Kekchí (Stand Zensus 2002) vör allen in de Departamentos Alta Verapaz, Petén un Izabal.

In Mexiko leevt 987 Kekchí (Stand 2000).

Spraak un Religion

Jemehr Spraak is dat Kekchí, wat en Maya-Spraak is. Blangen de traditschonelle Spraak bruukt se aver ok Engelsch (in Belize) un Spaansch (in Guatemala un Belize).

De Kekchí weren fröher Anhängers von de Maya-Religion, sünd aver al lang to dat röömsch-kathoolsche Christendom övergahn. Liekers sünd Elementen von de ole Religion bestahn bleven, de to en synkretistischen Maya-Katholizismus mank de Kekchí föhrt hebbt. Dör Mission sünd vondaag ok verscheden evangelikale Karken ünner de Kekchí vertreden.

Historie

Vör de spaansche Koloniaaltied hebbt de Kekchí vör allen in dat Rebeed leevt, wat vondaag de Departamentos Alta Verapaz un Baja Verapaz sünd.

Ünner de Spaniers sünd Gruppen von Kekchí aver jümmer wedder verdreven worrn un hebbt sik so över verscheden Rebeden verdeelt, ünner annern in Süüd-Belize, in de mexikaanschen Bundsstaten Chiapas un Campeche un de Departamentos Izabal, Petén un El Quiché in Guatemala.

Literatur

• Hilary E. Kahn: Seeing and Being Seen: The Q’eqchi’ Maya of Livingston, Guatemala, and Beyond. University of Texas Press, Austin 2006. ISBN 978-0-292-71348-2