Mairie Hornborg

De Mairie Hornborg weer in de Franzosentied (1810 bet 1813) een von de dree Mairien, in de de Kanton Hornborg indeelt weer. De Seet weer in Hornborg. Se harr 2775 Inwahners.

Historie

De Ümgegend von Hornborg hett vör de Franzosentied to de Gerichten Hornborg un Delm un dat Amt Oold- un Neeklooster in dat Hartogdom Bremen höört, wat in dat Kurförstendom Hannover leeg. Dat Kurförstendom Hannover weer in de Tied von de Koalitschoonskriege siet 1801 von Franzosen un Prüßen besett. To’n 1. März 1810 is dat Rebeed denn Deel von dat Königriek Westfalen worrn, wat en Satellitenstaat von Frankriek weer.

Binnen Westfalen weer de Mairie Hornborg een von de söss Mairien in’n Kanton Hornborg von’n Distrikt Stood, Departement von de Elv- un Wersermünnen. Man al to’n 1. Januar 1811 harr dat wedder en Enn. Dat Königriek Westfalen müss dat Departement direkt an dat Franzöösche Kaiserriek afgeven. De Mairie Hornborg weer nu een von de dree Mairien in’n Kanton Hornborg, Distrikt Stood, Departement von de Elvmünnen. De Mairie weer nu düüdlich grötter, dor sünd Öörd in tohoopfaat worrn, de vörher in Westfalen to de veer Mairien Hornborg, Bliersdörp, Neeklooster un Issendörp (all veer in’n Kanton Hornborg) höört harrn.

1813/1814 hebbt de Russen de Franzosen slahn un dat Rebeed befreet. Dat Kurförstendom Hannover is denn wedder herstellt worrn un de ole Stand von vör 1810 wedder dor. Mit’n Wiener Kungress is 1815 ut dat Kurförstendom dat Königriek Hannover worrn.

Öörd

Dor hebbt düsse Öörd tohöört:

• Königriek Westfalen:

  Hornborg, Daudiek, Slagbeker Möhl, Lütt Slagbeek, Düringsmöhl, Vordermöhl un veer Göder

• Kaiserriek Frankriek:

  Hornborg, Daudiek, Slagbeek, Düringsmöhl, Vordermöhl (1320 Inwahners)

  Bliersdörp, Nottensdörp, Grundolendörp, Ruschwedel (630 Inwahners)

  Neeklooster, Heendörp (485 Inwahners)

  Issendörp, Rüst, Helmst (340 Inwahners)

Vondaag sünd düsse Öörd Deel von de Samtgemenen Hornborg, Obbens, Harsfeld un de Stadt Buxthu.