Ralph Fonseca
Ralph Henry Fonseca (* 9. August 1949) is en Politiker ut Belize (PUP).
Leven
ännernFonseca is 1949 boren. David Fonseca weer sien Broder un Francis Fonseca is sien Vedder. Fonseca weer op dat St. John’s College un hett denn Informatschoonstechnologie in Kanada studeert.
He is verheiraadt un hett dree Kinner. Sien eenzigen Söhn, Ralph Jr., is an’n 11. September 2007 bi en Verkehrsunfall doodbleven.[1]
Politik
ännernFonseca is Maat von de People’s United Party (PUP).
Bi de Parlamentswahl in Belize 1984 weer he Kannedaat för de PUP in’n Wahlkreis Queen’s Square un hett de Wahl mit 32,3 % von de Stimmen gegen Dean Barrow von de UDP verloren. Bi de Wahl 1989 is Fonseca nich wedder antreden, is aver von Premierminister George Cadle Price in’n Senaat beropen worrn. He is bet 1993 in’n Senaat bleven.
As Senater weer he von 1989 bet 1993 Staatsminister in dat Ministerium för Finanzen ünner Finanzminister George Cadle Price.
Bi de Wahl 1993 is Fonseca denn in’n Wahlkreis Belize-Land Zentraal antreden un hett de Wahl mit 72,9 % von de Stimmen gegen Lloyd Gillett von de UDP wunnen. Ok bi de Wahl 1998 (72,55 % gegen Louis Sylvestre, UDP, un Gloria Marie Bowen, PDP) un de Wahl 2003 (66,50 % gegen Colin Gillett, UDP) kunn he sik in’n sülven Wahlkreis wedder dörsetten. Bi de Wahl 2008 dorgegen hett he blots noch 46,62 % von de Stimmen haalt un kunn sik nich gegen Michael Hutchinson von de UDP dörsetten.
Dormit weer he von’n 30. Juni 1993 bet 7. Februar 2008 Afornten von dat Repräsentantenhuus von Belize.
De eersten fiev Johr hett he mit de PUP in de Oppositschoon seten. Ünner Premierminister Said Musa is he 1998 Minister för Budgetplanung, -verwaltung, Weertschopliche Entwicklung, Investment un Hannel in dat Kabinett Musa I worrn.[2] De Tostännigkeit för Weertschopliche Entwicklung hett Fonseca an’n 28. April 2000 an Jorge Espat afgeven.[3] Dorför hett he aver de Opsicht över de Zentraalbank un de Freezonen tokregen, för de vörher de Finanzminister tostännig weer.[3] Nadem Maxwell Samuels in en Skandaal üm Visa-Vergaven verwickelt weer, müss Samuels dat Binnenministerium (mitsamt de Tostännigkeit för Immigratschoon) in’n August 2002 an Fonseca afgeven.
In dat Kabinett Musa II hett Fonseca 2003 dat Amt as Minister för Finanzen övernahmen un dat Binnenministerium behollen.
In’n August 2004 keem dat to ene Regerungskries, as rutkamen is, dat Fonseca as Finanzminister Geller ut’n Soziaalversekerungsfonds bruukt hett, üm Kredite von private Ünnernehmens aftosekern.[4] Söven Ministers hebbt Musa opfeddert, Fonseca ut dat Kabinett ruttosmieten.[4] As Musa dat nich daan hett, wullen de söven Ministers (de Grupp is von de Medien in Belize „G7“ döfft worrn) all gemeensaam jemehr Ämter afgeven.[4] Ofschoonst Musa Fonseca nich rutsmeten hett, kunn he den Rüggtridd afwennen un hett dat Kabinett ümbillt.[5]
An’n 14. Juli 2005 müss Fonseca dat Amt as Minister för Investment afgeven, hett aver dat Ministerium för Apentliche Versorgung to sien Portfolio tokregen.[6]
2006 müss he sien Posten as Minister för Finanzen afgeven un weer denn blots noch Binnenminister un Minister för Apentliche Versorgung. An’n 5. Juni 2007 hett he tosätzlich dat Ministerium för Huusbo von Cordel Hyde övernahmen.
Footnoten
ännern- ↑ Anita Nembhard: Freak accident kills two Ralph, Jrs., Amandala an’n 14. September 2007
- ↑ Musa names 16 member Cabinet, Channel 5 Belize an’n 31. August 1998
- ↑ a b Espat loses immigration portfolio in cabinet shuffle, Channel 5 Belize an’n 28. April 2000
- ↑ a b c Seven GOB ministers resign!, San Pedro Sun an’n 19. August 2004
- ↑ 7 return, 3 added to new cabinet, Channel 5 Belize an’n 18. August 2004
- ↑ Latest Cabinet shuffle reduces number of ministries, Channel 5 Belize an’n 14. Juli 2005