Eenfachen Kraken

(wiederwiest vun Octopus vulgaris)

De Eenfache Krake oder Slichte Krake (Octopus vulgaris), ok woll fökener bloß Oktopus (Plural Oktopoden) nömmt, höört to de Koppfööt, un dor to de Ornen vun de Kraken mit to.

Eenfachen Kraken; Slichten Kraken; Oktopus
Eenfachen Kraken (Octopus vulgaris)
Systematik
Ünnerriek: Veelzellers (Metazoa)
Afdeel: Geweevdeerter (Eumetazoa)
Ünnerafdeel: Bilateria
Böverstamm: Lophotrochozoen (Lophotrochozoa)
Stamm: Weekdeerter (Mollusca)
Klass: Koppfööt (Cephalopoda)
Ünnerklass: Dintenfische (Coleoidea)
Böverornen: Achtarm-Dintenfische (Vampyropoda)
Ornen: Kraken (Octopoda)
Familie: Echte Kraken (Octopodidae)
Geslecht: Kraken an sik (Octopus)
Oort: Eenfachen Kraken, Slichten Kraken
Wetenschoplich Naam
Octopus
Cuvier, 1797

Kennteken ännern

So bewegt sik de Eenfache Krake

Den Eenfachen Kraken sien Mantel steiht wiet open un warrt bit hen to 25 cm lang. De Fangarms könnt bit hen to een Meter lang weern. Dor sitt twee Regen mit Suugproppens an. Düsse Kraken hefft en Dintenbüdel. Vunwegen datt de Slichte Krake keen Buten- un ok keen Binnenskelett hett, kann he sik bannig goot rögen un kummt allerwegens dör, ok wenn dat bannig eng is.[1]

Wo he vorkamen deit ännern

De Eenfache Krake leevt in de Tropen un in de matigen Zonen in de See up de ganze Welt. An’n fökensten antodrepen is he nich wiet af vun Grootbritannien un de Küst vun Süüdoostasien. De Aart leevt up’n Grund vun de See, bit hen to 200 m deep, an den üteren Rand vun de Kontinentalschelfe. Dor gifft dat allerhand verscheden Levensrüme, as Felsen, Korallenriffe un Seegraswischen.

Systematik ännern

Octopus vulgaris is in all Seen up’e Welt funnen wurrn. Systematikers meent, dor hannelt sik dat um en Aardenkumplex bi un nich bloß um en enkelte Aart. Wie de allerhand Populatschonen tosamenhangt, is noch nich akraat unnersocht wurrn.

Wat he freten un wie he sik vermehren deit ännern

De enfache Krake fritt sunnerlich Kreefte (Krabben un Hummers) un Weekdeerter (Musseln un Sniggen).

De Seken produzeert twuschen 120.000 un 400.000 Eier un leggt de as Snöre af in Klöven un Höhlen in siede Waters. Dat Afleggen vun de Eier kann sik bit to en Maand lang hentrecken. In de Brödeltied (25-65 Dage, dat hangt vun de Temperatur vun’t Water af) fritt dat Seken meist nix. Vundeswegen gaht allerhand Krakenmudders ok in, wenn de Larven utkrapen sünd. De Larve, wenn se sik entwickeln deit, höört to dat Plankton mit to. Buten in’e See kann de Eenfache Krake bit hen to twee Johre oold weern, man wenn he bi Minschen optimal holen warrt, kann he ok bit hen to dree Johre oold weern.[2]

Fischeree ännern

De Eenfache Kraken warrt sunnerlich to’n Eten fungen un kummt fangfrisch, fraren oder dröögt un solten up’n Markt. De Food and Agriculture Organization seggt, in dat Johr 1999 sünd 34.262 Tons fungen wurrn, dormank 19,081 Tons ut Mexiko un 8.844 Tons ut Italien. Generell kann seggt weern, datt de Fangtahlen vun de laten 1960er Johre af an torüch loopt. Dormols sünd mehr, as 100.000 Tons in’t Johr fungen wurrn.

Belege ännern

  1. weichtiere.at Kraken Stand: 1. Mai 2008
  2. Oktopous-Orakel Paul Alterserwartung Kraken Stand: 10. Juli 2010

Literatur ännern

  • Michael Hutchins (Rutg.): Grzimek’s Animal Life Encyclopedia, 2nd edition. Volume 2, Protostomes, Farmington Hills, MI: Gale Group, 2003.

Weblenken ännern

  Eenfachen Kraken. Mehr Biller, Videos oder Audiodateien to’t Thema gifft dat bi Wikimedia Commons.