Odoaker

Odoaker (Flavius Odoacrus/Odovacar/Odowaker/Odoacer; * 433; † woll an’n 15. März 493 in Ravenna) weer en Heerführer bi de Westgermanen, he sett as röömsche Söldnergeneraal den lesten weströömschen Kaiser Romulus Augustulus af, un siene Suldaten repen em 476 as König vun Italien ut.

Leben

Allgemeen

Odoaker weer de Söhn vun Edekon (Edicio), eenen Mann in den Deenst vun den Hunnenkönig Attila un een Froo ut den Stamm vun de Skiren. Wo Edekon vun afstammen dö, is nich klar. Odoaker is an Attila sienen Hoff groot wurrn. Mitunner warrt ok seggt, he scholl to de Heruler ehren Stamm tohöört hebben. He glööv an de christlich Lehr vun Arius as de meisten Germanen un konn womöglich nich lesen un nich schrieven.

Sien Weg as Suldat

Odoaker deen in de persönliche Wach vun den weströömschen Kaiser Anthemius. As düsse Kaiser sik mit sienen Heerföhrer Ricimer in de Klatten kreeg, slöög sik Odoaker up Ricimer sien Siet. De Heerföhrer Flavius Orestes sett 475 den lesten Kaiser vun Westrom af, de nah Recht un Gesett up'n Thron seet. Dat weer Julius Nepos, de utkniepen möss na Dalmatia. Orestes hett sienen Söhn Romulus mit den Ökelnamen Augustulus (lüttje Kaiser, vunwegen sien Jöögd) to'n Schaddenkaiser maakt un süms de Macht in'e Hannen hollen. Nu stünnen aber de Hölpstruppen ut de Barbaren up un foddern Land in Italien. De ehr Baas weer Odoaker. Orestes hett sik dor nich up inlaten. Dor hefft de Truppen ehren Willen mit schier Gewalt dörsett. Allto swaar weer dat nich, denn dat geev ja meist keen weströömsche Armee mehr un de Hölpstruppen weeren de eenzigst Militärmacht in Italien.

Orestes harr inst mit Odoaker sienen Vadder an den Hoff vun Attila leevt un sik dor mit em in'e Haaren legen. Dat kann angahn, datt Odoaker em ut düsse Jahren her al nich lieden moch.

Rex Italiae

Odoaker sien Riek 480

An't Enn vun'n August 476 hett Odoaker Orestes an'e Siet bröcht. Sien Söhn Romulus hett he an'n Leben laten un bloß afsett. Odoaker hett nu den Kaiser sienen Smuck un Kledaasch nah Konstantinopel henstüürt un verklaart, dat weer nu in'n Westen nich mehr nödig, eenen Augustus to hebben. He för sienen Deel woll jedenfalls ünner den Kaiser vun Oostrom siene Flunken ünnerkrupen. Denn hett he sik süms to'n Rex Italiae (König vun Italien) utropen. As Julius Nepos sturben weer, hett de ooströömsche Kaiser Zeno em as Vullmacht öber Italien in ooströömschen Updrag insett.

Wat Odoaker ännert hett un wat nich

Odoaker hett womöglich Land verdeelt an de Germanen, de nah Italien inwannert weeren (vör allens Heruler, Skiren un Thüringer). Kann aber ok angahn, dat he dat nich maakt hett, man Delen vun de Stüürn, de in sien Land innahmen wurrn sünd, an de Germanen wietergeven hett. Senat, Verwalten, Stüür- un Justizsystem leet he so, as dat vördem wesen weer. De Kultur vun de late Antike hett sik to sien Tiet nich groot ännert un dat de Kaiser nich mehr dor weer, hett ok woll keenen besunnern Indruck maakt. De hett ja so un so nix mehr to seggen harrt.

De lesten Jahren

477 hett Odoaker de Wandalen vun Sizilien verdreben. 481 nehm he Dalmatien in. Dor hett he den ooströömschen Kaiser mit gegen sik upbröcht. 488 hett he de Rugier ehr Riek in Noricum tweislahn. Vun dat sülbige Jahr af an möss he sik gegen de Ostgoten to Wehr setten, de vun Oostrom ut ünnerstütt wurrn sünd. As he een paar Slachten verlaren harr, hett he in dat Jahr 493 versöcht, mit den ostgootschen König Theoderich den Groten öbereen to kamen un sik to verdregen. Bi een Festeten in Ravenna hett Theoderich em mit egen Hannen ümbröcht. Theoderich geev den Grund an, he hett noch wat torüch to betahlen harrt an Odoaker.

Böker öber Odoaker

Herwig Wolfram: Odowakar, in: Reallexikon der germanischen Altertumskunde, Bd. 21, S. 573–575.
László Várady: Epochenwechsel um 476. Odoaker, Theoderich der Große und die Umwandlungen, Budapest/Bonn 1984.

Up Platt is nix öber Odoaker rutkamen.