Ohrens

Wapen/Flagg	Koort
Basisdaten
Bundsland: Neddersassen Landkreis: Stood Samtgemeen: Harsfeld Gemeen: Bargst
Inwahners:
Postleettall:	21698
Vörwahl:	04164
Geograafsche Laag:	53° 28′ N, 9° 28′ O

Ohrens (hoochdüütsch Ohrensen) is en Dörp in de Gemeen Bargst (Samtgemeen Harsfeld) in’n Landkreis Stood, Neddersassen. Dat Dörp liggt an de Au.

Geografie

Dat Dörp liggt op de Stoder Geest. De höögste Punkt is de Rombarg mit 37,7 Meter över NN en Stück in’n Oosten von dat Dörp. Dat Water ut dat Rebeed flütt af över den Rehrfeldgraven un den Depenbeek. De Beken münnt all beid in de Au, de en halven Kilometer in’n Süden von dat Dörp langsflütt.

De Naveröörd sünd Lusthoop in’n Noorden, Issendörp in’n Noordoosten, Harsfeld in’n Süüdoosten un Bargst un Frankenholt in’n Westen.

Historie

Toeerst in de Oorkunnen kummt de Oort an’n 11. November 1105 as Ordensen vör. Disse Oorkunn hannelt von dat Utstafferen för dat ne’e Klooster Katelnborg dör Adela von Katelnborg.

De ole Watermöhl an’n Depenbeek kummt toeerst 1664 in de Oorkunnen vör un is bet 1907 lopen. Vondaag warrt de Möhl as Jugendinrichtung bruukt.

Vör 1885 weer dat Dörp in de Böörd Bargst binnen dat Amt Harsfeld. Na 1885 hett dat denn to’n Kreis Stood höört un von 1932 af an to’n hüdigen Landkreis Stood.

In’n Eersten Weltkrieg sünd söven Soldaten ut Ohrens fullen oder vermisst un in’n Tweten 19.

Ohrens is an’n 1. Juli 1972 bi de Gemeenreform in Neddersassen mit de Gemeen Bargst tohoopleggt worrn.

Inwahnertall

Johr	Inwahners
1824-00-001824	13 Füürsteden
1848-00-001848	196 Lüüd, 32 Hüüs
1910-12-011. Dezember 1910	253
1925-00-001925	275
1933-00-001933	290
1939-00-001939	310

Religion

Ohrens is evangeelsch-luthersch präägt un höört to dat Kaspel von de Primus-Kark in Bargst.

För de Kathoolschen is de St.-Michaels-Kark in Harsfeld tostännig, de siet 1. September 2010 to de Karkengemeen Mariä Himmelfohrt in Buxthu höört.

Wapen

Dat Wapen wiest op blauen Grund in’n Schildfoot en gollen Barg un in’e Midd twee krüüzte sülverne Sweertbläder un veer gollene Rosenblöten.

Dat Wapen hett de Heraldiker Horst Scheffler utklamüsert un is 2005 annahmen worrn. De Sweertbläder staht för dat sassische Sweert, dat Martin Mushard vör üm un bi 300 Johr in’n Heinholt funnen hett. De Rosenblöten stammt ut dat Wapen von Harsfeld. De Barg in’n Schildfoot steiht för den Wall von de ole Ohrensborg un de blaue Achtergrund is ut dat Wapen von Stood nahmen.

Dat Dörp harr al vör 2005 en Wapen, dat as Symbol för de Ohrensborg en Wehrtoorn un en Palisaad wiest hett. Dat is aver aflehnt worrn, vonwegen dat nüms dat Utsehn von de ole Ohrensborg kennt un Borgen to de Tied von de Ohrensborg wohrschienlich keen Wehrtoorn un Palisaden harrn.

Kultur

En Denkmaal för de Fullenen ut de twee Weltkrieg’ steiht bi’n Karkhoff. Blangen de Fullenen ut Ohrens sülvs warrt ok negen Soldaten gedacht, de ut de Oostrebeden kemen un de-ehr Familien na’n Krieg in Ohrens en ne’e Heimat funnen hebbt.

Verenen

De Freewillige Füürwehr is 1938 grünnt worrn.

Infrastruktur

Verkehr

Ohrens liggt an de Landsstraat 123, de in’n Noordoosten över Issendörp na Hornborg un in’n Süüdwesten na Bargst löppt. Een Kilometer oosten von’t Dörp krüüzt de L 123 sik mit de L 124, de in’n Süden över de Au na Harsfeld löppt un in’n Noorden na Stood. Lüttjere Straten gaht na Frankenholt un Lusthoop.

En Radweg an de L 123 na Issendörp is 2013/2014 boot worrn.

Literatur

• Ohrensen. Ein Dorf auf der Stader Geest. 2005

Weblenken

• Websteed över dat Dörp (hoochdüütsch)