Oklahoma

Oklahoma is en Bundsstaat vun de USA. He hett 3.450.654 Inwahners (Stand 2005) op en Rebeet vun 181.196 km². De Hööftstadt is Oklahoma City. Dat Woort Oklahoma kümmt ut de Choctaw-Sprake: okla bedutt de Minsch un humma heet root. Tohopen heet dat denn so veel, as „den roden Mann sien Land“. De Ökelnaam vun Oklahoma is The Sooner State. Dat hangt dor mit tosamen, dat de eersten Siedlers dat Land, wat de Regeern de Indianers afköfft harr, besiedeln döen, ehr dat se dor Verlööf to harrn (sooner = ehr dat).

Inwahners

6,8 % oder 244.326 vun de Inwahners vun düssen Staat sünd Indianers. Dat is düütlich mehr as in'n Dörsnitt vun de US-Bundsstaaten. De wichtigsten Indianerstämm in düssen Staat sünd de Cherokee, de Chickasaw, de Choctaw, de Comanchen, de Kiowa un de Muskogee. 7,4 % sünd Afroamerikaners, 75,4 % sünd Witte. So is dat bi den Zensus in't Johr 2006 tellt wurrn.