Ottenbeek

Wapen/Flagg	Koort
Basisdaten
Bundsland: Neddersassen Landkreis: Stood Gemeen: Stood
Inwahners:
Postleettall:	21684
Vörwahl:	04141
Geograafsche Laag:	53° 34′ N, 9° 30′ O

Ottenbeek (hoochdüütsch Ottenbeck) is en Stadtdeel von Stood in’n Landkreis Stood, Neddersassen.

Luftbild von Ottenbeek, in’n Vörgrund dat Gelänn von Airbus (2012)

Luftbild von Ottenbeek (in’n Vörgrund), in’n Achtergrund de B 73 un Kamp (2012)

Gebüüd von dat CFK-Valley in Ottenbeek

Geografie

Ottenbeek liggt op de Geest, aver direkt an de Geestkant hen na de Masch von Oolland in’n Oosten. Twee Kilometer in’n Westen liggt de Masch von de Swing.

De Naveröörd sünd Stood mit Kamp in’n Noorden, Speersoort un Hollern in’n Noordoosten, Bachenbrook in’n Oosten, Gothenborg in’n Süüdoosten, Helmst in’n Süden, Steenbeek un Hagen in’n Süüdwesten un Riensföör in’n Westen.

Historie

De Landschop twischen Stood un Gothenborg dee al lange Tied Ottenbeek heten. 1934 is dor denn de de Flegerhorst Stood boot worrn. De Flegerhorst is 1945 von de Allieerten oplööst worrn un dat Gelänn is denn as Lager för Verdrevene bruukt worrn. 1956 hett de nee grünnte Bundswehr dat Gelänn övernahmen un dor de Von-Goeben-Kasern inricht. Nadem dat 1994 mit de Kasern ut weer, is dat 85 Hektar grote Stück Land bilütten in en Wahn- un Gewarvrebeed ümwannelt worrn. Opstunns leevt in Ottenbeek so bi 2000 Lüüd. De olen Kasernenhüüs, de deelwies ünner Denkmaalschutz stünnen, sünd to’n groten Deel bleven un ümboot worrn.

Nadem al 1959 Hamburger Flugzeugbau in Ottenbeek en Wark opmaakt harr, dat nu as Airbus-Wark Stood to de Airbus Group höört, hebbt sik na dat Enn von de Kasern in Ottenbeek veel Firmen ut de Luftfohrt-Industrie ansiedelt. Vör allen sone Firmen, de mit CFK to doon hebbt. En Wark von Saertex bestünn von 2002 bet 2020.

Religion

För de evangeelsch-luthersche Kark höört Ottenbeek to de Gemeen von de Wilhadi-Kark in de Binnenstadt von Stood.

För de Kathoolschen is de Hillig-Geist-Kark in Stood tostännig.

Infrastruktur

Verkehr

Ottenbeek is good an’n Verkehr anslaten. Glieks bi Ottenbeek fangt de Autobahn 26 an, de na Hamborg hen geiht (Opfohrten 2 Stood-Süüd un 3 Stood-Oost). De Bundsstraat 73 geiht in’n Noordwesten na Cuxhoben un över de Geest in’n Süüdoosten na Buxthu. Na Keden rin geiht de Landsstraat 111. De nächste Bahnhoff is de Bahnhoff Stood, de so bi dree Kilometer weg is. Direkt bi Ottenbeek liggt ok en lütten Floogplatz.

Scholen

De Oort hett mit de Grundschool Ottenbeek en egen Grundschool. Ans gifft dat mit de Förderschool Ottenbeek noch en Förderschool un ok en Kinnergoorn. Na Gymnasium gaht de Schölers op dat Athenäum Stood.

Literatur

• Dietrich Alsdorf: Ottenbeck: vom Fliegerhorst zum Stadtteil. 2000
• Dietrich Alsdorf: Nachtjäger vor den Toren Hamburgs. VDM Heinz Nickel, Zweibrücken, ISBN 3-925480-57-9