Peter Charles Doherty

Peter Charles Doherty AC (* 15. Oktober 1940 dicht bi Brisbane, Australien) is en austraalsch Deertenmediziner un Immunoloog.

Peter Charles Doherty

Leven

Doherty kreeg 1962 den Bachelor un 1966 den Master in Veterinärmedizin an de University of Queensland. Sien Doktertitel PhD kreeg he 1970 vun de University of Edinburgh in Schottland. In de folgend Johren harr he verscheeden Forschungsstäen för Mikrobiologie, Immunologie un experimentelle Pathologie. To Tiet is he een vun de Leiter vun de Afdeelen för Immunologie an dat St. Jude Children’s Research Hospital in Memphis, Tennessee un is dree Maand in’t Johr in Memphis un de anner negen Maand an de Universität Melbourne tätig.

Tosommen mit den Swiezer Rolf Zinkernagel kreeg he 1996 den Nobelpries för Medizin för dat Opdecken, wu dat Immunsystem virusinfizeert Zellen erkennt, tospraaken. Virusbefallene Zellen wurrn vun dat Immunsystem dör Killer-T-Zellen erkannt un vernichtet. Doherty funn bi dat Ünnersöken vun mit Meningitis-Viren infizeert Müüs, dat disse Killer T-Zellen för dat Upfinnen vun virusbefallen Zellen nich blots en Virus-Antigen bruuken, sonnern ok de MHC-Komplexe, vun de man tovör all wuss, dat se bi dat Geweevafstööten bi Transplantatschonen en Rull spelen. Hör Rull in de Immunafwehr gegen Viren keem unverwacht.

1983 harr he all den Paul-Ehrlich-und-Ludwig-Darmstaedter-Pries kreegen, 1986 en Gairdner Foundation International Award, 1995 de Albert Lasker Award for Basic Medical Research. In Australien kreeg he 1997 den Titel Australian of the Year 1997. 1999 kreeg he de Leeuwenhoek-Medaille vun de Royal Society. 1998 wurr he Liddmaat vun de National Academy of Sciences, 2001 Fellow vun de American Association for the Advancement of Science. 2006 wurr he as utländsch Liddmaat in de Russische Akademie vun de Wetenschapen upnommen.

Weblinks

• Indrag in de DNB
• Peter C. Doherty up de Sieden vun den Nobelpries (engelsch)
• Peter Doherty aan dat St. Jude Children’s Research Hospital