Rolf Zinkernagel

Rolf Martin Zinkernagel (* 6. Januar 1944 in Riehen, Basel-Stadt) is en Swiezer Mediziner un experimenteller Immunoloog. 1996 kreeg he den Nobelpries för Medizin tospraaken.

Rolf Zinkernagel.

Leven

Zinkernagel hett van 1962 bit 1968 Medizin studeert un sien Doktertitel 1970 an de Universität Basel mit en Thema to de klinische Neurologie maakt. He is Liddmaat vun de Zofingia. Van Oktober 1970 bit 1973 hett he as wetenschaplich Assistent an dat Institut för Biochemie vun de Universität Lausanne arbeit. 1975 kreeg he den Ph. D. an de Australian National University in Canberra un hett sück dor ok habiliteert. Van 1976 bit 1979 weer he Perfesser an dat Scripps Research Institute, ansluutend gung he an de Universität Zürich, an de he bit 1992 bleev. Later hett he an dat Institut för experimentelle Immunologie vun dat Universitätsspital Zürich arbeit. In‘n Februar 2008 is Rolf Zinkernagel in den Ruhestand treeden.

Tosommen mit den Australier Peter Charles Doherty hett he 1973 opdeckt, wu dat Immunsystem virusinfizeert Zellen erkennt. För disse Erkenntnis kreegen de beid 1996 den Nobelpries für Medizin. Zinkernagel weer dormit de 24. Swiezer Nobelpriesdräger. Virusbefallene Zellen wurrn vun dat Immunsystem dör Killer-T-Zellen funnen un verneelt. Mit Doherty hett he bi dat Ünnersöken vun Meningitis-Viren infizeert Müüs herutfunnen, dat disse Killer T-Zellen för dat Erkennen vun virusbefallen Zellen nich blots en Virus-Antigen bruuken, sonnern ok de MHC-Komplexe, vu de man tovör wuss, dat se bit dat Afstööten vun Geweev bi Transplantatschonen en Rull spelen. Dat se aber ok en Rull in de Immunafwehr gegen Viren spelen, harr man nicht verwacht.

Ehrungen

• 1981 Cloëtta-Pries
• 1983 Paul-Ehrlich-un-Ludwig-Darmstaedter-Pries
• 1986 Gairdner Foundation International Award
• 1987 William B. Coley Award
• 1988 Otto Naegeli-Pries
• 1995 Albert Lasker Award for Basic Medical Research
• 1996 Nobelpries för Physiologie oder Medizin (gemeensam mit Peter Charles Doherty)

1989 wurr he as ordentlich Liddmaat in de Academia Europaea upnommen. Siet 1994 is he Liddmaat vun de Düütsch Akademie vun de Naturforscher Leopoldina (siet 2008 Natschonale Akademie vun de Wetenschapen). 1996 wurr Zinkernagel in de National Academy of Sciences, 1998 in de American Academy of Arts and Sciences un 2001 in de American Philosophical Society wählt.

Literatur

• Gisela Baumgart: Zinkernagel, Rolf. In: Enzyklopädie Medizingeschichte. Hrsg. von Werner E. Gerabek, Bernhard D. Haage, Gundolf Keil und Wolfgang Wegner, Walter de Gruyter, Berlin und New York 2005, S. 1530
• Rolf Zinkernagel: Viruses and Virus Like Agents in Disease. Basel 1993.

Weblinks

Rolf Zinkernagel. Mehr Biller, Videos oder Audiodateien to’t Thema gifft dat bi Wikimedia Commons.

• [https://www.nobelprize.org/prizes/medicine/1996/summary/ Rolf Zinkernagel up de Sieden vun den Nobelpries (engelsch)
  • Rolf Zinkernagel: Autobiografie