Prickelsteertaanten

De Prickelsteertaanten (Oxyurinae) sünd en Familie mank de Aantenvagels. Dor hannelt sik dat um Aanten bi, de sunnerlich veel un goot dükern doot. Vun de annern Aanten in den Unnerfamilie Echte Aanten verscheelt se sik in so veel Kennteken, dat se dor na de Systematik, de hier bruukt warrt, nich mit toopenfaat weert.

Prickelsteertaanten
Wittkopp-Prickelsteertaante (Oxyura leucocephala)
Systematik
Ünnerstamm: Warveldeerten (Vertebrata) Klass: Vagels (Aves) Ornen: Gösevagels (Anseriformes) Familie: Aantenvagels (Anatidae) Ünnerfamilie: Prickelsteertaanten (Oxyurinae)
Wetenschoplich Naam
Oxyurinae

Swattkopp-Prickelsteertaant mit Prickelsteert

Kennteken

Vun all Aantenvagels sünd de Prickelsteertaanten an’n meisten anpasst an dat Waterleven. De Been sitt so wiet achtern an’t Lief, dat se sik bi’n Lopen veel töffeliger anstellt, as annere Aanten. De Fööt sünd unbannig groot. De Steert, de bi annere Aantenvagels kort un rechtkant‘ is, is bi de Prickelsteertaant lang un spitz un steiht faken piel na boven, as en Prickel. He warrt bi’t Dükern as Stüerroder bruukt. Wohrschienlich, vunwegen datt de Steertfeddern gau sliten doot, weert se tweemol in’t Johr heel un deel uttuuscht. Ok de Snavel is bi de Prickelsteertaant anners, as bi annere Aanten. An de Wuddel is he breet un hooch, vörn is he na boven bagen, as en Schuffel. De “Doorn” an de Snavelspitz is as en Haken na unnen bagen. Dat Lief vun de Prickelsteertaanten is breet un kort, de Hals is kort un man dick, de Flunken sünd kort un breet. In de Brödeltied verscheelt sik de Aanten. Dor is de Waart bunter un lücht mehr, as de Aante. Nadem de Brödeltied to Enne is, sleiht dat Heken in de Farv wedder mehr na dat Seken un fallt nich wieter up. He blifft en veel grottern Deel vun dat Johr in sien Slichtkleed, as annere Aanten.

Wo Prickelsteertaanten leven doot

Prickelsteertaantn gifft dat up all Kontinente, man bloß nich in de Antarktis. Vun Europa, Asien un Afrika bewohnt se bloß man en lüttjen Deel. De meisten Aarden sünd up den amerikaaschen Dubbelkontinent to finnen. Vun de Arktis bet hen na de Tropen leevt se in all Klimazonen. Tohuse sünd se up Ströme un Binnenseen, towielen ok in Brackwater man nich an de Küst vun’e See.

Wat se freten doot

Se verscheelt sik na dat Freten hen nich veel vun de Dükeraanten. Se dükert na den Grund vun dat Water un wöhlt mit den Snavel in’n Modder an’n Grund un söökt dor na Freten. Dat könnt Planten oder Sniggen, Musseln un Wörmer ween. Muggenlarven sünd de Hauptmahltied for de meisten Aarden.

Systematik

In Kear siene Systematik vun de Aantenvagels staht de Prickelsteertaanten buten de Unnerfamilie Anatinae, wo de meisten annern Aanten tohören doot. Vunwegen, datt se sik in veel Kennteken vun de annern verscheelt, kaamt se dor in den Rang vun en egene Unnerfamilie mit. De Geslechter un Aarden na Kear sünd:

• Geslecht Heteronetta
  • Kuckucksaant, Heteronetta atricapilla
• Geslecht Nomonyx
  • Schabellenskopp-Prickelsteertaant, Nomonyx dominicus (towielem to Oxyura torekent)
• Geslecht Oxyura
  • Swattkopp-Prickelsteertaant, Oxyura jamaicensis
  • Argentiensche Prickelsteertaant, Oxyura vittata
  • Austraalsche Prickelsteertaant, Oxyura australis
  • Afrikaansche Prickelsteertaant, Oxuyra maccoa
  • Wittkopp-Prickelsteertaant, Oxyura leucocephala

En annere Aart is 2005 beschreven wurrn. Dat weer Oxyura vantetsi, de up Neeseeland tohuse weer un hüdigendags utstorven is.

Literatur

• P. J. Higgins (Rutg): Handbook of Australian, New Zealand & Antarctic Birds, Band 1, Ratites to Ducks, Oxford University Press, Oxford 1990, ISBN 0195530683
• Janet Kear (Rutg): Ducks, Geese and Swans. Oxford University Press, 2005, ISBN 0-19-854645-9

Kiek ok bi

• List vun Vagels

Weblenken

Prickelsteertaanten. Mehr Biller, Videos oder Audiodateien to’t Thema gifft dat bi Wikimedia Commons.