Roatán is en 125 km² groot Eiland von de Islas de la Bahía in de Karibische See 50 km vör de Noordküst von Honduras. Dat höört to dat Departamento Islas de la Bahía. Dat Eiland hett Stand 2019 60.657 Inwahners, is 60 km lang un 8 km breed.

Strand bi West Bay
Krüüzfohrt-Haven bi Coxen Hole

Wichtigsten Oort is Coxen Hole.

GeografieÄnnern

In’n Westen liggt dat Eiland Útila un in’n Oosten Guanaja. Direkt vör de Küsten von Roatán doot de lüttjeren Eilannen Isla Morat, Rose Cay, Barbareta un Fort Morgan Cay liggen. Twüschen Roatán un den fasten Wall doot de Cayos Cochinos liggen. De Krallenriffs rund üm de Islas de la Bahía warrt to dat Maya-Riff tellt.

De höögste Punkt op dat Eiland is mit 228 m över de See de Dixon Hill un de tweethöögste mit 224 m över de See de Picacho Hill.

Polietsch is dat Eiland indeelt in de Municipios José Santos Guardiola (Oosten, 1960 ut en Deel von dat Municipio Roatán billt) un Roatán (Westen).

InwahnersÄnnern

De Inwahners von Roatán nöömt sik sülvs Islanders. Von de Lüüd op’n fasten Wall in Honduras warrt se op Spaansch Caracoles nöömt, wat de Inwahners aver nich geern höört.

De inheemschen Spraken op Roatán sünd Bay Islands English as Ümgangsspraak ünner de Imheemschen un Engelsch in’n Kuntakt mit Totagene un Touristen. Von Totagene ut Fastland-Honduras warrt ok Spaansch snackt.

HistorieÄnnern

An’n 20. Februar 1797 sünd 2248 „swarte Kariben“ (Black Caribs) von de Briten von Baliceaux na Roatán bröcht worrn. Dat weren Garifuna, de ut St. Vincent herkümstig weren. Na düsse Tied hebbt de Spaniers dat Eiland innahmen un dat hett na de Unafhängigkeit to de Zentraalamerikaansche Kunfederatschoon höört. In’n Mai 1830 un en tweet Maal 1839 hebbt de Briten ünner Alexander MacDonald Roatán innahmen, kunnen sik aver beide maal nich lang hollen. Liekers hett sik dör de Garifuna brietsch-karibische Kultur un de engelsche Spraak hollen.

In’n Oktober 1998 is dat Eiland von Hurrikan Mitch swoor drapen worrn.

Weertschop un InfrastrukturÄnnern

 
Krüüzfohrtschipp Carnival Legend vör Coxen Hole

Vondaag speelt de Tourismus en groten Rull för dat Eiland. Dor doot Krüüzfohrtscheep anleggen un Dukers un Snorklers besöökt Roatán. Bevör de Tourismus groot worrn is, weer vör allen de Fischeree von Belang.

VerkehrÄnnern

Flegerverkehr löppt över’n Juan Manuel Gálvez International Airport. Fähren gifft dat direkt na La Ceiba un över Útila na La Ceiba.

WeblenkenÄnnern

  Roatán. Mehr Biller, Videos oder Audiodateien to’t Thema gifft dat bi Wikimedia Commons.



Koordinaten:16° 23′ N, 86° 25′ W